Nga Endri ÇINARI
Vllaznia është tashmë në garën e ethshme për të ruajtur vendin e dytë në kampionat dhe siguruar edhe “final 4”. Shkodranët do kenë një kalendar të vështirë në 3 javët e fundit. Ku duke nisur nga kjo fundjavë ndaj Dinamos. Edhe blutë kryeqytetas kanë ambiciet e tyre për tu renditur mes 4 më të mirave.
E po ashtu të luajnë deri në fund shanset për titullin kampion. Prandaj të shtunën drejt Shkodrës, të besuarit e Mehmetit udhëtojnë me qëllimin e qartë për të marrë pikë. Por statistikat nuk janë aspak në favor të “nëndetëses” përsa i përket përballjeve me kuqeblutë në Superiore. Fitorja e fundit në elitën e futbollit shqiptar për Dinamon ndaj Vllaznisë daton para 14 vitesh.
Më saktë në datën 25.09.2010, ku dinamovitët fitonin në Shkodër me rezultatin e thellë 0-4. Që nga ajo periudhë në Superiore mes dy skuadrave, Vllaznia ka marrë 9 fitore dhe 3 ndeshje janë mbyllur në barazim mes dy ekipeve. Gjatë kësaj periudhe, Dinamo ka edhe një fitore në vitin 2019 në shifrat 2-0, por dueli është zhvilluar në Kategorinë e Parë.
E po ashtu blutë kanë një sukses në shifrat 1-0 në vitin 2011, ky sukses në kuadër të gjysmëfinaleve të kupës. Pra, një domimin kuqeblu përgjatë gjithë këtyre viteve i Vllaznisë. Ku shkodranët do kërkojnë që këto statistika t’i pasurojnë edhe të shtunën dhe kjo për më tepër edhe për objektivat e këtij edicioni./www.shkodrasport.com/
