Emri i Elseid Hysajt ka filluar të qarkullojë në klubet më të mëdha europiane, por ka një klub të vetëm të cilit Napoli nuk dëshiron t’ia shesë mbrojtësin shqiptar, edhe nëse është gati të paguajë shifrën e vendosur në klauzolë.
Gazeta napolitane “Il Mattino”, tregon se Juventusi është klubi më i interesuar në Itali për të siguruar firmën e futbollistit të përfaqësueses shqiptare.
Një interesim të tillë, administratori Marota ia ka shprehur edhe menaxherit të Hysajt, i cili më pas ka dërguar mesazhin në zyrat e Napolit.
Por përgjigja e Aurelio De Laurentis ka qenë mëse e qartë. “As që bëhet fjalë!”, është mesazhi që menaxheri Mario Xhiufredi, ka marrë nga drejtuesi i Napolit dhe ua ka përcjellë atyre të Juventusit, duke i lënë të kuptohet se transferimi i futbollistit shqiptar nga napolitanët te torinezët ishte i pamundur.
Presidenti i Napolit ka vendosur të shesë futbollistin vetëm jashtë Italisë dhe duke parë interesimin e klubeve më të mëdha europiane për të, nuk do të ketë të vështirë t’i gjejë një sistemim në momentin që do të dëshirojë të dekretojë largimin e tij. /vipsport/
