Vllaznia ka afruar deri më tani gjashtë futbollistë, si Lorik Boshnjaku, Kaina Nunesh, Dajan Shehi, Kristijan Vulaj, Marko Juriç dhe Herald Marku. Këta janë gjashtë futbollistët e afruar deri më tani dhe nisur nga ajo që paralajmëroi trajneri Mirel Josa, goditja e fundit mund të jetë një sulmues krahu.
Trajneri Josa la të hapur mundësinë e afrimit të ndonjë sulmuesi krahu në ditët në vijim, teksa më i preferuari mbetet Redon Mihana, i cili është nën kontratë me Apoloninë e Fierit. Nga ana tjetër, futbollisti nga Tetova, Shefit Shefiti, me të cilin klubi ishte futur në bisedime, mësohet se ka rënë si pistë prej ditësh, pasi 24-vjeçari ka oferta më të mira.
Repartet e mbrojtjes, mesfushës dhe sulmit janë forcuar ndjeshëm, duke dubluar thuajse çdo pozicion. Kërkesat e kreut të pankinës, Josa janë plotësuar nga klubi, për më tepër që largime si Mevlan Adili, Ardit Krymi dhe Victor Da Silva, kanë qenë shumë të rëndësishme.
Megjithatë, si ndryshon Vllaznia pas afrimeve të fundit? Të paktën katër nga gjashtë përforcimet e deritanishme, pritet të përfshihen direkt në formacion. Për momentin, Josa ka provuar dy skema: 4-3-3 dhe 4-2-3-1. Rivaliteti për një vend është shtuar, ndërsa një “xhol” në pjesën ofensive do të jetë Vulaj, i cili mund të bëjë disa role.
Shehi në qendër të mbrojtjes, Boshnjaku në rolin e shkatërruesit, Marku në mesfushë dhe Vulaj si sulmues i dytë ose nga krahët, janë risitë e formacionit kuqeblu që do të luajë në turin e dytë të Conference League ndaj Universitea Kraiovës, teksa ndeshja e parë është në Shkodër më 21 korrik.
Nga merkatoja e bërë, vetëm reparti i portës dhe në një farë mënyre sulmi nuk është prekur, edhe pse rikthimi i brazilianit Nunes është një alternativë direkte për qendrën e ofensivës, aty ku Aralica shikohet si titullar fiks. Megjithatë, në sulm është edhe Ardit Hoxhaj dhe Mehdi Çoba, që mund të bëjnë mirë jo vetëm nga krahët, por edhe si pykë.
Gjithsesi, me Zogoviç në portë, kapitenin Gurishta në krahun e djathtë dhe Hakajn në të majtë, Josa merr garanci në prapavijë. Me largimin e Adilit, në qendër ka tashmë tre futbollistë të afirmuar për dy vende, pikërisht Bulatoviç dhe dy afrimet e merkatos, Shehi dhe Juriç. Më afër formacionit duket dyshja Shehi-Bulatoviç, ndërsa kroati ka pak ditë që i është bashkuar ekipit dhe kërkon kohë për t’u përshtatur.
Me skemën 4-3-3, Josa duket se është më i prirur për t’i besuar një vend në mesfushë Boshnjakut, Jonuzit dhe Markut. Megjithatë, një kandidat potencial për të qenë pjesë e formacionit është edhe boshnjaku Heriç, i cili u preferua nga Josa në fundin e sezonit të shkuar.
Mesfusha është reparti më i mbipopulluar për momentin, pasi aty mund të luajë edhe Kristijan Vulaj, i cili është një sulmues i dytë tipik, që mund të qëndrojë më afër Aralicës, por në të njëjtën kohë ka aftësi që të luajë mirë në të dy krahët e ofensivës.
Vulaj pritet të jetë një “xhol” për skemat e Josës, teksa me 4-2-3-1 do të ishte pikërisht i vendosur pas sulmuesit kryesor. /Maringlen ZHIVANI/
Vllaznia (4-3-3): Zogoviç, Gurishta, Shehi, Bulatoviç, Hakaj, Jonuzi, Boshnjaku, Marku, Vulaj, Latifi, Aralica Tr: Mirel Josa
