Vllaznia duket se është skuadra që këtë sezon jo vetëm po bën mirë vetë me ecurinë e saj, por po u prish punë dhe “rekorde” edhe kundërshtarëve të saj në kampionat.
Deri para javës së kaluar, Kastrioti krenohej sepse kishte 6 javë pa humbje dhe erdhi Vllaznia që ia prishi këtë seri pozitive duke e mundur me rezultatin e pastër 3-0 brenda në fushën e tij.
Ndërkohë deri para kësaj jave, tek Partizni krenoheshin me rekordin e portierit të tyre Alban Hoxha që kishte 6 ndeshje pa pësuar gol në kampionat dhe kishin bindjen se do ta vazhdonin pathyeshmërinë e tij.
Goli i fundit që i ishte shënuar ka qenë ai i futbollistit Ermir Rezi të Kastriotit në ndeshjen e javës së parë të kampionatit, pikërisht në minutën e 86-të të asaj ndeshje hapëse.
Që nga ai moment dhe deri tek goli i Haris Dilaver kishin kaluar plot 630 minuta, por goli i sulmuesit boshnjak të Vllaznisë 4 minuta para fundit të ndeshjes të së dielës, ia prishi këtë rekord portierit të të kuqve.
Vllaznia duket se sivjet është ekipi që do të bëjë gjithçka mirë për vete, por edhe do të shndërrohet në “gogolin” e kundërshtarëve të saj./SHKODRA-SPORT.COM/
