Tregu veror i transferimeve vendosi rekorde historike. Sipas një raporti të publikuar nga FIFA, ka qenë sezoni i transfertave me më shumë shpenzime në historinë e futbollit me 6878 milionë euro investime në blerje futbollistësh.
Analiza përfshin periudhën nga 1 qershori deri më 1 shtator 2023. Kjo shifër paraqet një rritje prej 47,2% krahasuar me të njëjtën periudhë të vitit të kaluar dhe një rritje prej 26,8% krahasuar me vitin 2019, periudhë kur u shënua rekordi i mëparshëm.
“Premier League kryesoi me 1,840 miliardë investime dhe gjithashtu për numrin e afrimeve (449) dhe të lojtarëve të transferuar (514),” komentoi Emilio García Silvero, drejtor i Divizionit të Shërbimeve Ligjore dhe Pajtueshmërisë të FIFA-s.
Nga ana e saj, Gjermania regjistroi shumën më të lartë të të ardhurave nga transfertat (1,037 miliardë euro). Një faktor vendimtar në thyerjen e të gjitha rekordeve ishte ndërhyrja me prepotencë e Arabisë Saudite.
Me një total prej 817 milionësh (shumë e shpenzuar për blerjen e futbollistëve, kryesisht të “yjeve” nga futbolli evropian), Liga Saudite zë vendin e dytë në listë, vetëm pas Premier League-s, por përpara Francës (802 milionë), Gjermanisë (712), Italisë (664) dhe Spanjës (378).
Kjo është hera e parë që klubet e një konfederate tjetër (jo të UEFA-s), në këtë rast ajo aziatike, kalojnë 10% të shpenzimeve totale.
Po kështu, 650 milionë janë paguar si tarifa menaxherësh gjatë periudhës së transferimit të kësaj vere, që përbën një rekord të ri.
