Në mediat shqiptare ditën e djeshme është bërë e ditur se në Federatën Shqiptare të Futbollit ka mbërritur dosja numër 2 e ndeshjeve të trukuara. Kjo dosje ka ardhur sërish nga UEFA pas sinjalizimeve që ajo ka marrë nga kompanitë e basteve. Thuhet se numri i ndeshjeve këtë herë është më i madh se në rastin e dosjes së parë në të cilën Vllaznia u pat përfolur vetëm për ndeshjen Kastrioti- Vllaznisë, ndeshje e cila në fakt është nën hetim. Edhe ai hetim u pat kërkuar nga vetë kryebashkiaku i Shkodrës Lorenc Luka për të dalë e pastër skuadra që ai drejton. Po në dosjen numër 2, a përmendet kund emri i Vllaznisë? Këtë askush nuk mund ta thotë ende sepse FSHF-ja nuk ka dashur t’i bëjë publike ndeshjet për të cilat dyshohet. Thuhet vetëm se numri i ndeshjeve është më i madh dhe në të, janë të përfshira thuajse të gjitha skuadrat e Superligës, në ndeshje kampionati e kupe. Rrjedhimisht duhet të jetë edhe Vllaznia nëse janë të gjitha. Në Shkodër në fakt janë shumë të interesuar ta marrin vesh sa më shpejt këtë gjë sepse Bashkia, institucioni që drejton klubin e futbollit aktualisht, kuptohet që nuk ka dorë në gjëra të tilla dhe nëse konstatohen dyshime, sërish duket se do jetë ajo e para që do të kërkojë shkuarjen e hetimeve deri në fund. Çfarë do rezultojë nga hapja e kësaj dosje? Këtë për momentin askush nuk mund ta thotë por një gjë është e qartë: frika i ka pushtuar të gjithë. Të paktën edhe për përmendjen e emrit nuk është mirë sepse dëmton imazhin pavarësisht nëse kontatohet ajo jo gjë pastaj pas hetimeve.
www.shkodrasport.com
