Ekipi i Adës në futboll për femra e ka marrë shumë seriozisht luftën për të dalë për të dytin vit rradhazi kampion i Shqipërisë. Pasi e ka mbyllur fazën e parë në vend të parë me fitoren e arritur ndaj rivales direkte Juban Danjës, ajo është tre pikë para saj në renditje dhe për ta ruajtur këtë pozicion deri në fund, ka hyrë në merkato për marrjen e lojtareve cilësore. Blerja e parë që presidenti i këtij ekipi Lazer Matia ka bërë, ka qenë shumë e goditur. Ada ka marrë futbollisten Megi Doçi nga ekipi Tirana AS.
Kjo futbolliste është golashënuesja më e mirë e kampionatit aktualisht teksa ka shënuar një numër të madh golash, plot 22 dhe blerja e saj, është një përforcim shumë I rëndësishëm për ekipin velipojak. Madje, presidenti Matia ka bërë të ditur se marrja e kësaj sulmueseje nuk është bërë vetëm për këtë kampionat e për këtë arsye me të është firmosur një kontratë dyvjeçare. Por me marrjen e Doçit, Ada përveçse ka bërë një përforcim të rëndësishëm, ka arritur të dobësojë edhe një nga kundërshtaret e saj kryesore, ekipin Tirana As duke I marrë lojtaren më të mirë. Në këtë mënyrë, velipojakët duket se e kanë shumë seriozisht rishpalljen kampion për të dytin vit rradhazi. Ashtu siç do kërkojnë të fitojnë për të dytin vit rradhazi edhe Kupën e Shqipërisë.
www.shkodrasport.com
