Pavarësisht se u mendua se do të ishte një ecuri ndryshe ajo e Adës në fazën e dytë të kampionatit, në fakt është edhe më e keqe se ajo e fazës së parë.
Këtë e tregojnë edhe rezultatet e arritura në javët e fundit. Për t’u shqetësuar në fakt sepse humbja e djeshme për shembull, ka qenë më e rëndë nga sa mendohej, plot 1-7.
Ka ndodhur në ndeshjen që ajo ka luajtur në Gramsh ndaj skuadrës vendase.Në fakt ndeshja nuk ka filluar keq për velipojakët.
Ata janë gjendur në disavantazh që në minutën e 12-të kur Bezhani ka kaluar në avantazh Gramshin por ky avantazh ka zgjatur vetëm 1 minutë sepse Nimet Limoni do të barazonte shifrat për Adën.
Ky gol dha të kuptohet se ajo do të merrte një rezultat pozitiv në këtë takim, por nuk do të ndodhte kështu.
Vendasit do të shënonin edhe plot 5 gola të tjerë në këtë pjesë dhe po ashtu edhe një tjetër në të dytën duke fituar kësisoj me shifrat 7-1.
Pas javës së 14-të të kampionatit, Ada ka mbetur në kuotën e 15 pikëve dhe është pozicionuar në vendin e 11-të të renditjes.
© shkodrasport.com
