Në komunikimin e sotëm online me qytetarët shkodranë, natyrisht që nuk mund të mungonin as pyetjet e bëra në adresë të kryebashkiakes Voltana Ademi në lidhje me procesin e privatizimit të Vllaznisë. Ja si është përgjigjur ajo:
“Jemi në procesin e privatizimit tashmë. Në këto momente po lidhet kontrata me vlerësuesin, me firmën që do të kontraktojmë në sajë të procesit të konkurrimit që kemi bërë dhe do të vijojmë me firmosjen e kontratës për vlerësimin e Vllaznisë.
Pastaj do të jetë Këshilli Bashkiak që shpresoj përtej diskutimeve që mund të kemi, t’i hapë rrugë një procesi që ne duam të realizojmë për futjen e investitorëve që mund të jenë edhe të shumtë në Shkodër.
Ka shkodranë, madje edhe familjarë të thjeshtë që duan të investojnë tek Vllaznia. Më kujtohet shpesh Barcelona që ka një tifozëri të madhe që merr pjesë në administrimin e klubit. Kuptohet që ne jemi larg asaj dhe kjo mund të jetë e pamundur për ne.
Por unë shpresoj që bizneset në Shkodër, ata që duan të investojnë, ata që e ndjejnë me zemër dhe kanë një dëshirë ta bëjnë këtë, të afrohen pranë skuadrës së tyre. Nga ana tjetër, ka dy të huaj që kanë shprehur interesin e tyre.
Ata kanë qenë para disa ditësh në Shkodër për ta vëzhguar situatën. Unë garantoj se procesi do të jetë i hapur, i menaxhuar teknikisht dhe profesionalisht. Kjo nuk do të ndodhë përpara prillit por më në fund do të ndodhë pas shumë vitesh dhe unë jam optimiste për këtë”.
© shkodrasport.com
