Agim Ibraimi padyshim është luks i shtuar në kampionatin shqiptar. Sulmuesi i Kukësit ka gjetur dalëngadalë formën e tij e tashmë po mrekullon çdo sportdashës me cilësitë teknike që zotëron.
Në një intervistë ndryshe për “Sport Time”, ai analizoi shkurtimisht situatën te verilindorët, tregoi ndryshimin e futbollit shqiptar me atë maqedonas si dhe zbuloi tratativat e Partizanit për ta pasur në ekip. Fillimisht foli për Kukësin, teksa u shpreh:
“Kur kam takuar Nderim Nexhipin, më ka thënë që mos ta mbyll karrierën pa e provuar në Shqipëri. Shoh, që paska pasur të drejtë. Ne shkojmë mirë në skuadër. Po shkoj mirë me Patric Eze. Merremi vesh. Shpresoj që nuk më kanë parë mediet për atë kërcimin në ndeshje. (Qesh).
Futbolli shqiptar? Është më lart se ai maqedonas. Atje janë vetëm 2-3 ekipe, këtu luftojnë të gjitha skuadrat. Kanë edhe stadiume të mira mund të veçojmë, Elbasanin, Vllazninë etj.
Partizani? Po është e vërtetë që isha pranë firmës me të kuqtë. Por, në atë kohë firmosa me Shkëndijën e Tetovës. Gjej rastin t’i përshëndes për mundësinë e dhënë.
Vllaznia? E kam thënë që bëjnë lojën më atraktive në Shqipëri. Kampionati është shumë i gjatë dhe s’duhet marrë çdo ndeshje me eufori. Futbolli ka treguar se s’duhet t’i marrim gjërat lehtë. Kur fitojmë jemi gjithë bashkë, dihet. Por, edhe kur humbim është e njëjta gjë.
Kombëtarja? Më ka mbetur vetëm kampionati europian. Shpresoj t’i ndihmoj me eksperiencën time, kombëtaren e Maqedonisë. Shpresoj se do të jap maksimumin. Koha do ta tregojë vetë.
Shqipëria? Gjatë gjithë kohës, kam pasur ekipin e moshave. Mua Maqedonia më ka ndihmuar, më ka marrë edhe si lojtar në ekipin e parë. Për ngjyrat kuqezi ju e dini, ne tetovarët jemi shumë patriotë, mos t’i hyjmë shumë më thellë”./newsport/
