Kamza do të luajë një ndeshje mjaft të rëndësishme përballë Vllaznisë e cila do të luhet në Shkodër.
Në një prononcim para ndeshjes, tekniku i Kamzës, Julian Ahmataj është shprehur se në këtë sfidë do të kërkohet fitorja, ndërkohë që për Sebino Plakun ai u shpreh se nuk do të jetë i gatshëm.
Sa i përket ndeshjeve të mbetura, Ahmataj u shpreh se nuk bën asnjë llogari, pasi këto gjëra nuk ecin në futboll por dihet që vetëm të shihet nga ndeshja në ndeshje.
“Fati është pjesë e futbollit. Normalisht kemi zhvilluar 2 ndeshje të mira. Kemi krijuar shumë raste në ndeshje me tension të lartë dhe kjo ka bërë që skuadra të luajë në ekuilibër.
Sulmi është pika që kemi ngulmuar pasi e dimë që ekipi pëson gol dhe fakti që arrijmë të shënojmë na jep frymëmarrje.
Lojtarët janë profesionistë dhe kemi një grup simpatik. Asnjë ndeshje nuk luhet për barazim apo humbje por gjithçka luhet vetëm për fitore dhe ky objektiv më ka ndjekur gjithë jetën.
Plaku? Shpresoj që ta kem të gatshëm por ka një tërheqje dhe më duket e pamundur të luajë edhe pse po bën përpjekje maksimale.
Javët e mbetura? Nuk bëj llogari pasi në futboll nuk dalin. Para 3 javësh flisnim ndryshe, pasi në Korçë nuk morëm pikë dhe kemi rrezikuar që disa ndeshje t’i humbnim apo disa t’i fitonim.
Ndeshja e radhës është ndaj Vllaznisë dhe atë ndeshje synojmë fitore”, u shpreh Ahmataj. /Vipsport/
