Presidenti i Barcelonës, Joan Laporta ka shpërthyer ndaj akuzave të reja të La Ligës për klubin katalanas. Dje, La Liga akuzoi Barcelonën për manipulimin e bilanceve financiare duke i fryrë ato për të anashkaluar rregullat e Fair Play Financiar.
Në reagimin për këtë, presidenti Laporta, tha se përgjigjja ndaj La Ligës do të jetë e ashpër, duke shtuar se në pamundësi për t’i ndalur në fushë, po tentojnë t’i dëmtojnë jashtë saj.
“Do t’i përgjigjemi La Ligës në mënyrë të ashpër! Nuk mund të na mposhtin në fushë, kështu që po përpiqen të na dëmtojnë jashtë saj. La Liga e kishte miratuar regjistrimin e Pau Victor dhe Dani Olmo dhe tani ka ndryshuar mendje. Kjo tregon që ata kanë bërë një punë të keqe kur e pranuan atë fillimisht.
Sot kemi një ndeshje shumë të rëndësishme (gjysmëfinalen e Kupës së Mbretit kundër Atletico Madridit), dhe pikërisht sot në mëngjes La Liga del me këtë deklaratë. Sa e çuditshme! Kjo është një përpjekje për të na dëmtuar në momentet kyçe të sezonit”, tha Laporta.
