“Bëmat” e viteve të fundit në arenën ndërkombëtare kanë krijuar perceptimin jashtë kufijve tonë se shqiptarët trukojnë ndeshje, ose të paktën kanë dijeni për takime të manipuluara.
Kjo “famë” e padëshiruar ka kaluar kufijtë e Europës dhe tashmë po përdoret edhe në Afrikë për të siguruar para nëpërmjet mashtrimit, aq sa në Kenia është kthyer në një problem më vete.
Bastet sportive cilësohen aktualisht një nga problemet më të mëdha në këtë vend, një “epidemi” që ka pushtuar Kenian dhe që sipas mediave në këtë shtet,
po rëndohet më shumë nga fakti se në rrjete sociale ofrohen mundësi për të siguruar të ardhura nga informacionet mbi ndeshje të manipuluara.
Sipas një artikulli të “Hivisasa”, persona të ndryshëm ofrojnë nëpërmjet rrjeteve sociale fitime të mëdha nëse blen informacionet e tyre për ndeshje të trukuara në vende të ndryshme të botës.
Që të bëhen sa më bindës, përveç fotove të skedinave fituese nga ndeshje të mëparshme, të cilat zakonisht janë fotomontazhe, personat në fjalë përdorin strategji mjaft interesante “publiciteti”.
Ata kanë krijuar profile false në Facebook, me emra shqiptarë, turk apo të shteteve të tjera të cilat në Kenia njihen si “vatra” manipulimesh.
Në këtë mënyrë, personat që nuk kanë shumë dijeni për gjëra të tilla, bien pre e mashtrimit, duke paguar para për të marrë një listë me ndeshje të cilat në fakt nuk kanë asnjë lloj vërtetësie.
Njerëzit thjesht bien pre e perceptimit të krijuar se “shqiptarët” apo “turqit” që manipulojnë ndeshje, janë në dijeni të ngjarjeve të ngjashme në vendet e tjera në botë.
“Ajo që viktimat nuk kuptojnë është se personi i cili ua shet këto ndeshje mund të jetë komshiu i derës ngjitur i cili shtiret si një shqiptar”, shkruhet në artikullin në fjalë. /vipsport/
