Futbollisti shkodran, Albi Shpuza, ka marrë një ftesë nga Kombëtarja e Kosovës U-21 për t’u stërvitur me të. Ai është thirrur në grumbullimin për ndeshjen e ardhshme kualifikuese për EURO 2025, që do të zhvillohet në Hungari kundër Izraelit.
Performanca e tij në kampionatin e Kosovës ka bërë që trajneri Afrim Tovërlani ta bëjë Shpuzën pjesë të 21-vjeçarëve të Kosovës. Deri më tani, mësohet se paraqitja e tij në seancat stërvitore ka qenë e mirë, duke rënë në sy në ndeshjet e kontrollit brenda grupit.
Padyshim, në rast se Shpuza lë gjurmë pozitive tek stafi teknik dhe trajneri Afrim Tovërlani, me siguri që do të përzgjidhet për të qenë pjesë e kësaj Kombëtareje edhe në të ardhmen.
Në fakt, Shpuza është një element që ka spikatur sezonet e fundit në ekipet ku ka luajtur, duke rënë në sy për lojën dhe golat që ka shënuar. Ndërkohë, sa i takon Kosovës U-21, ajo garon në Grupin D të kualifikueseve europiane, së bashku me Gjermaninë, Poloninë, Izraelin dhe Estoninë.
Maringlen ZHIVANI
