Nga Gjergj KOLA
Në historinë e mundjes shkodrane ka shumë emra që kanë lënë gjurmë me talentin e tyre. Kuptohet jo të gjithë kanë mundur të shpallen kampionë, por gjithsesi kanë dhënë një kontribut të madh në rezultatet e ekipit të Vllaznisë. Dhe njëri prej tyre ka qenë edhe Jonuz Rustemi (Bajri).
Po ndalemi sot tek ky personazh sepse kjo ditë përkon me 5 vjetorin e ndarjes së tij nga jeta. Ka qenë 31 janari i vitit 2019 kur ai u nda nga jeta në moshën 77 vjeçare duke lënë pas një emër shumë të mirë në këtë sport dhe jo vetëm.
Ka lindur në vitin 1941 dhe nis të merret që herët me mundje. Me të rinjtë merr pjesë në kampionatin e vitit 1959 e më pas kalon me të rriturit ku tregon një formë shumë të mirë sportive duke qenë gjithmonë në mes më të mirëve.
Duke u stërvitur nga trajneri Qazim Elbasani, ai i ka shërbyer jo pak Vllaznisë përkrah emrave të tillë të këti sporti si Gjovalin Çuni, Ymer Gruda, Sul Rama, Halil Gelqerja, Hamza Çela, Fejzi Lahi, Gjon Leka, Metush Gerçari, Naim Pepa, Dushan Vaso, Eljaz Guri, Ali Murrizi, Nikoll Grimaj, Besim Piranaj, Gegë Paloka etj.
Për pak kohë ka përfaqësuar edhe Besëlidhjen e Lezhës. Në vitet e fundit të karrierës përveçse si sportist, bën edhe detyrën e zëvendëstrajnerit duke qenë pranë trajnerit Qazim Elbasani dhe duke nxjerrë nga duart e tyre shumë kampionë./SHKODRA-SPORT.COM/
