Prej 27 vitesh nuk jeton më mes nesh, por sot ia vlen ta kujtojmë sërish. E kemi fjalën për ish- atletin dhe ish- trajnerin e Vllaznisë Kujtim Rrjolli ngaqë nëse ai do të ishte gjallë, do të festonte 72 vjetorin e lindjes së tij.
Kujtim Rrjolli ka lindur në Shkodër më 24 prill 1951 dhe rininë e tij do t’ia kushtonte sportit të atletikës. Nën drejtimin e trajnerit të mirënjohur Feti Dizdari, ai që në moshën 15 vjeçare fokusohet tek disiplinat e hudhjesve, pikërisht në çekiç, shtizë dhe gjyle.
Që në garat e para spikat me paraqitjet e tij dhe konkretisht në datat 5-6 tetor 1967 në kampionatin kombëtar për të rinj që zhvillohet në Durrës, Rrjolli e hedh shtizën në distancën 43.42 m dhe zë vendin e dytë duke u shpallur nënkampion Shqipërie.
Një vit më vonë, në garat e kampionatit kombëtar të të rinjve që zhvillohet në Korçë në datat 24-27 korrik, ai e hedh
shtizën në distancën 51.20 m dhe është sërish i dyti dhe nënkampion.
Rezultatet e Kujtimit vijnë duke u rritur dhe në fazën e dytë të kampionatit kombëtar të të rinjve që zhvillohet në
datat 21-22 maj 1969 me rezultatin 46.69 m, zë vendin e parë.
Edhe në garat e vitit 1970 (ai merr pjesë në garat e 19-20 vjeçarëve) Kujtim Rrjolli është i suksesshëm duke zënë
vendin e parë në garat e kampionatit kombëtar që u zhvillua në datat 9-12 gusht pikërisht në hedhjen e çekiçit me
distancën 39.12 metra.
Edhe në garat e zhvilluara në datat 9-12 gusht të vitit 1970, Kujtimi do të zinte vendin e parë edhe në hedhjen e
shtizës me rezultatin shumë të mirë, 55.07 metra.Gjatë këtyre viteve, Kujtim Rrjolli do të punonte edhe me trajnerët e tjerë Teodor Lashova, Myzafer Vorfa e Llesh Vuksani, trajnerin- sportist.
Me të rriturit ndërkohë është shquar sidomos në hedhjen e çekiçit dhe rezultati i tij prej 53 metrash ka qenë shumë i
mirë për kohën.
në vitin 1981 Kujtimit i besohet drejtimi i ekipit të hudhësave të Vllaznisë si trajner. I pandarë nga sportistët me
përvojë si Kujtim Boshnjaku, Nefail Kraja, Pjerin Tafili e Viktor Gjoka, ai ndërtoi një ekip simpatik i cili shumë shpejt do të jepte rezultatet e para: me kampionë e rekordmenë në të gjitha grupmoshat.
Nga duart e Kujtim Rrjollit kanë dalë sportistë si Rita Bruzhdulli, Gjyljana Bikuri, Zemje Breçani, Artan Shpuza, vëllezërit Bektashi si dhe kampionët e rekordmenët në fuqi Spartak Kovaçi e Vladimir Sokoli.
Natyrisht që kanë qenë të rrallë në Shqipëri trajnerë të tillë si Kujtimi që stërviste me shumë sukses kaq shumë sportistë cilësorë. Me të rriturit ai qe një shok i mirë, me vajzat një prind i kujdesshëm ndërsa me të rinjtë një edukator shembullor. Megjithatë iku shpejt duke lënë një peng të madh prapa tek kolegët e tij, Syrrija, Hysnija, Rasimi, Askoja, Lleshi, Besimi, Vildani, Rroku, Isaku, Angjelina, Nexhi, Sebrija, Ardiani, Ahmeti, Nefaili, Pjeri, Tonini, Lahi, Enveri, Kola, Xhulio, Beni e Nafija
Por në vitin 1996, Kujtim Rrjolli u nda nga jeta në mënyrë të papritur pas një aksidenti të pësuar, duke ikur shumë shpejt,pikërisht në moshën 45 vjeçare, kur kishte ende shumë për t’i dhënë shumë sportit të atletikës.
Pak ditë më parë ndërkohë, në një aktivitet të zhvilluar në Shkodër, Bashkia e këtij qyteti e ka nderuar Kujtim Rrjollin me “Mirënjohje” për kontributin e dhënë në vite si sportist dhe si trajner, titull që është marrë nga i biri, Armandoja.
Gjergj KOLA
