Presidenti i Atlético Madridit, Enrique Cerezo, tha diçka të dielën, me të cilën nuk mund të mos biem dakord. Nga qindra përsëritjet e penalltisë së goditur nga Julián Álvarez në serinë e gjuajtjeve nga pika e bardhë kundër Real Madridit, në ndeshjen e kthimit të 1/8 finale të Ligës së Kampionëve, vetëm në atë që ofroi UEFA, 24 orë pas ndeshjes, shihet qartë sesi argjentinasi e prek topin me të dyja këmbët pothuajse në të njëjtën kohë.
Në atë video, çuditërisht në një plan të përgjithshëm shumë të turbullt dhe aspak të qartë, dallohet prekja e dyfishtë. Shumë e ngjashme, për hir të së vërtetës, me golin nga penalltia të Messit në finalen e Kupës së Botës, ku VAR-i nuk ndërhyri.
Por, siç thotë edhe Cerezo, në pjesën tjetër të imazheve, qoftë nga afër, nga larg, nga tribuna, nga pas portës apo nga fusha, në pamjet e transmetimit zyrtar ose ato të tifozëve nga shkallët e stadiumit, nuk mund të thuhet me siguri absolute se Álvarez e preku topin dy herë.
Kjo është aq e dyshimtë saqë mund të shtrohet një pyetje tronditëse: a është e mundur që UEFA ta ketë modifikuar imazhin për ta mbyllur debatin rreth këtij vendimi kontrovers në fazën e 1/8-ave të Champions League?
Ka edhe imazhe të tjera, të cilat organizata që predikon “respektin” duket se nuk i ka parë, nuk dëshiron t’i shohë dhe as nuk do t’i shohë. Bëhet fjalë për gjestet e pahijshme të disa lojtarëve të Real Madridit gjatë festimeve të tyre ndaj tifozëve të Atlético Madridit. Ishte e pritshme që Vinicius t’iu tregonte atyre bilancin 15-0 në Champions.
Po ashtu, nuk përbënte surprizë që ai t’i dërgonte “në shtëpi”. Mbappé, i njohur për sjelljen e tij shembullore, të bënte një gjest vulgar ndaj tifozëve të Atlético Madridit, ishte e paimagjinueshme. Dhe që Rüdiger të imitonte një lëvizje “prerjeje fyti”, kjo padyshim që meriton ndëshkim.
Çfarë do të bëjë UEFA? Asgjë. “Respekti” është thjesht një slogan që Ceferin e shkel me këmbë, ashtu siç bën Mbappé me kundërshtarët e tij…
