Kapiteni i Vllaznisë, Amarildo Belisha, është shfaqur shumë i irrituar pas humbjes së pësuar në transfertë me Bylisin. Ai nuk e ka pasur me skuadrën, por me gjykimin që, sipas tij, ka ndikuar drejtpërdrejt në rezulta“Duket qartë që gjyqtarët po na ndëshkojnë sistematikisht. Edhe në Ballsh, ne ishim duke bërë maksimumin për të barazuar fillimisht, dhe më pas për të fituar, por faullet kundër nesh dhe vendimet e njëanshme, na dëmtuan, duke bërë që të mos dilnim me pikë.
Nuk e kuptoj se çfarë kanë me Vllazninë këta arbitra, duke mos mbajtur një ndeshje të drejtë! Po ta analizojmë ndeshjen me Bylisin, ne ishim dominues në fushën e lojës dhe minimalisht e meritonim të paktën një pikë. Kishim gjithçka kundër, gjykimin dhe terrenin. Ndaj këtyre të dyjave s’mund të bënim dot asgjë. Shpreh kritikat e mia ndaj ‘xhaketave të zeza’. Kjo, pasi të gjithë e kemi të qartë se si na kanë ndëshkuar në shumë ndeshje duke na mohuar shumë pikë. Atyre siç duket nuk u bën aspak përshtypje që po dëmtojnë një skuadër, e cila i ka dhënë vlera këtij kampionati”, – ka thënë fillimisht lojtari.Pavarësisht fakteve të sipërpërmendura, kapiteni Belisha ka pranuar se edhe vetë skuadra nuk ishte në nivel të lartë me lojën e saj. “Po të ndalemi te ndeshja, dhe sidomos në pjesën e parë, e patëm shumë të vështirë të dilnim në lojën tonë. Kundërshtari po luante shumë fort dhe me ndërhyrje të rënda, në një kohë kur po zhvillonim një ndeshje në një fushë të baltosur. Sa i përket golit, gabimi ishte yni. Neglizhuam në një moment që nuk duhet ta bënim. Më pas nuk mundëm dot të bënim asgjë. Kemi derdhur shumë djersë në atë takim, pasi donim medoemos një rezultat pozitiv, por ato na u mohuan”. Duke vijuar më tej prononcimin e tij, mbrojtësi i Vllaznisë, Belisha, ndalet edhe te sfida e fundjavës ndaj Apolonisë. Sipas tij, në “Loro Boriçi” nuk kanë shanse të lënë pikë.“Pikët e humbura ndaj Bylisit do të duhet t’i rikuperojmë kundër Apolonisë. Ne jemi të aftë që në ‘Loro Boriçi’ të nxjerrim ndeshje të mira dhe sigurisht që këtë do ta bëjmë në takimin kundër fierakëve”-ka thënë ai.
Admir URUÇI
