Kanë kaluar gjashtë muaj qëkur qendërmbrojtësi kosovar, Amir Rrahmani, ka konsoliduar pozitën e titullarit te skuadra e Napoli nën drejtimin e Luciano Spalletti. Me largimin e Maksimoviç gjatë verës së kaluar, Rrahmani u rendit i treti në hierarkinë e qendërmbrojtësve para fillimit të sezonit 2021/2022.
Gjithçka ndryshoi në momentin kur Manolas bëri paraqitje të dobët ndaj Juventus, në shtator të vitit të kaluar, në sfidën të cilën Napoli e fitoi me rezultat 2 me 1. Një gabim i frikshëm i qendërmbrojtësit grek, që pasoi me golin e shënuar nga Alvaro Morata, bëri që trajneri toskan, Luciano Spalletti, ta mendonte rotacionin e tij me Amir Rrahmanin.
Pra, që prej 20 shtatorit, 2021 – në ndeshjen të cilën e nisi si titullar ndaj Udinese në udhëtim, Amiri ka qenë vazhdimisht përkrah Koulibaly në binomin e qendërmbrojtjes të “partenopei”. Një sezon i shoqëruar me shumë ngritje për prishtinasin, hiç 3 javët e fundit, ku si ai, ashtu edhe tërë ekipi i Napoli – nuk po përjetojnë momentet më të mira nga aspekti i rezultateve të arritura.
Sido që të jetë, statistikat flasin në të mirën e Amir Rrahmanit. Ai është radhitur në mesin e dhjetë qendërmbrojtësve me më së shumti kilometra të vrapuara në fushë në Serie A. Konkretisht, në këtë evidencë statistikore, ai renditet i shtati, me mesatare prej 10,4 km të vrapuara për lojë. Para tij janë radhitur L. Martinez Quarta, Mattia Caldara, Rafael Toloi, Francesco Acerbi, Milan Skriniar dhe Luiz Felipe. Kësisoj, Amiri nga në këtë parametër fizik lë mbrapa vetes të gjithë qendërmbrojtësit tjerë që gravitojnë në kampionatin elitar italian.
Ata që e mbajnë mend mirë Amirin prej kohërave të hershme kur luante në pjesën e vendeve të ballkanit, gjegjësisht në Kosovë, Shqipëri (kur formonte katërshen e mbrojtjes me Fejzullahun, Vrapin dhe Cuculin te Partizani deri para 7 vjetësh), për të vazhduar në Kroaci me Lokomotiva Zagreb dhe Dinamo Zagreb – e dinë se si portretizohej si mbrojtës i ngathtë, pa shumë hapësira për ta bërë një hap gjigant në karrierë. Pak a shumë edhe në paraqitjet e tij të para me Kosovën, në 2016, ishte vërejtur një kondicion i tij jo i mirë fizik.
Ndërkaq parametrat e sotëm fizikë, si ky i kilometrave të vrapuara në fushë – me një mesatare tejet të kënaqshme për një qendërmbrojtës kur dihet se roli në fjalë është më shumë pozicional dhe statik – është tregues i mjaftushëm se si përulësia dhe serioziteti në punë e kanë bërë Rrahmanin të tejkalojë hapa të cilat ishin të paimagjinueshme deri para pak kohësh.
Sot, krenar me Amir Rrahmanin nuk hezitoi të shfaqet edhe Presidenti i klubit të Hellas Verona, Maurizio Setti, i cili në një intervistë që dha për të përditshmen lokale veroneze, “L’Arena”, u deklaroi, si vijon: “ta shikosh Rrahmanin titullar në një skuadër që po lufton për kreun e tabelës më bën të mburrem me të”.
Mbrojtësi kosovar do të kthehet në Verona të dielën, aty ku u kalit si lojtar në Serie A me Juric si trajner. Ekziston një urrejtje patologjike ndërmjet dy qyteteve, që reflektohet tej mase edhe te tifozët respektivë. Rëndomt janë pritur me fishkëllima të mëdha lojtarët e Napoli në Bentegodi.
Edhe Rrahmanin mund ta presë një mikpritje aspak miqësore, sa për ta bërë ndeshjen shumë të vështirë – edhe pse e tillë është për Napolin, kur kemi parasysh që ndeshet ndaj një skuadre që golin e gjen shumë lehtë, me lojtarë teknikë dhe efikasë në 30 metrat e fundit – si Barak, Caprari, Simeone apo vetë Tameze që shtyn shumë në tranzicion.
Sa për rikujtesë, Amir Rrahmani është kapiten efektiv i kombëtares së Kosovës, pasi Samir Ujkani nuk është zgjedhje e parë si portier, si rrjedhojë i takon Amirit që të jetë lideri i dardanëve sa herë që luhen ndeshjet.
Amiri me fanellën e kombëtares do të kthehet në terminet që tashmë veç dihen: më 25 mars ndaj Burkina Fasos në Prishtinë dhe më 29 mars ndaj Zvicrës në Zurich. Që të dyja ndeshjet janë miqësore, gjegjësisht përkojnë edhe me takimet e para në krye me përzgjedhësin e ri, Alain Giresse. Ky është përzgedhësi i pestë me të cilin do të punojë Amir Rrahmani te Kosova në gjashtë vjet përfaqësim të vendit tonë, nëse i llogarisim edhe Muharrem Sahitin dhe Primozh Gliha, të cilët drejtuan kombëtaren për vetëm një ndeshje si trajnerë tranzitorë (i pari ndaj Letonisë në Mitrovicë, që përfundoi me rezultat 4 me 3 dhe i dyti ndaj Greqisë në nëntor të vitit të kaluar, që mbaroi me rezultat 0 me 0)./nacionale.com/
