Vllaznia zyrtarizoi dje Suad Licin në postin e administratorit të klubit. Pas Astrit Gjyrezit apo disa drejtuesve të tjerë që nuk kishin edhe aq shumë lidhje me futbollin, kësaj radhe shkodranët kanë vendosur që t’ia besojnë Vllazninë një ishfutbollisti të kësaj skuadre.
Lici ka pranuar sfidën për të marrë “frenat” e klubit në dorë në një moment shumë të vështirë, ku flitet me miliarda borxhe, një ekip në Kategorinë e Parë dhe “basti” shumë i vështirë për ta rikthyer ekipin në Superiore. Në një analizë të hollësishme, duke ndjekur problematikat që ka Vllaznia, gazeta rendit 10 sfidat që e presin Suad Licin si administratori i ri i klubit.
1. Sfida e parë dhe më kryesorja ka të bëjë me ekipin. Lici duhet të ndërtojë një skuadër cilësore që do të marrë pjesë në një kampionat, ku shumë prej futbollistëve që do të ketë në përbërje, nuk e njohin fare. Kundërshtarë të panjohur, terrene të vështira dhe agresivitet më i madh në krahasim me Superioren. Tirana ndërtoi një ekip cilësor, që ia doli të rikthehej në elitë gjatë kampionatit të kaluar. Lici duhet të bëjë të njëjtë gjë.
2. Por, në ndryshim nga bardheblutë, Lici do të ketë një buxhet të reduktuar në dispozicion. Zgjedhjet duhet të jenë sa më të sakta dhe precize. Nuk ka vend për gabime, duke pasur parasysh që ka në dispozicion pak para për të shpenzuar.
3. Ish-lojtari duhet të ndryshojë rrënjësisht mënyrën e funksionimit të klubit shkodran. I duhet të ndërtojë një klub normal ku gjërat të shkojnë siç duhet.
4. Një sfidë e rëndësishme e Licit është mbrojtja e trajnerit “jabanxhi”. Në një ambient ku ka presion dhe shumë xhelozi nga vendësit, Likës i duhen krijuar kushte sa më komode për të punuar me skuadrën dhe Lici duhet t’ia mundësojë këtë.
5. I duhet të bëjë mirë edhe ndërlidhësin mes bashkisë dhe skuadrës, që ekipi të mos ndihet jetim në fusha të nxehta apo në përballjet me gabimet fatale të gjyqtarëve.
6. Dikur si lojtar ka marrë duartrokitje dhe shumë përshëndetje nga tifozëria e zjarrtë shkodrane. Por, entuziazmi në Shkodër ka rënë ndjeshëm. Një prej sfidave të Licit është përmirësimi i marrëdhënieve me tifozët vendës, duke i rikthyer edhe një herë besimin te skuadra.
7. Akademia e Vllaznisë është një prej më produktiveve në Shqipëri. Me ekipet e moshave, që janë gjithmonë kampione ose minimalisht finaliste, talentet janë të shumta. Lici duhet të përqendrohet tek akademia dhe lojtarët që prodhon ajo. Jo vetëm është një mundësi shumë e mirë që të krijohet baza për një ekip në vazhdimësi, por të mendohet edhe për përfitime financiare që janë kaq të rëndësishme në futboll.
8. Licit i duhet t’u bëjë ballë presioneve që vijnë nga “të fortët” që janë përmendur në shumë raste nga ish-trajnerët, Armand Cungu apo Ernest Gjoka. Njerëz me ndikim që do të kërkojnë të bëjnë qoka, duke pasur parasysh që ekipi luan në Kategorinë e Parë, do të jenë gjithmonë shqetësues dhe Lici ka një sfidë të vështirë për t’i përballuar.
9. Një çështje shumë e diskutueshme gjatë javëve të fundit ka qenë fakti se ku do t’i luajë Vllaznia ndeshjet si pritëse në Kategorinë e Parë. Në situatën ku ndodhet, Licit i duhet të këmbëngulë fort që skuadra t’i zhvillojë ndeshjet në “Loro Boriçi” dhe jo në “Reshit Rusi”, pasi do të binte ndjeshëm interesi.
10. Dikur në fushë dhe tani në tavolinë si drejtues, Licit i duhet të bëjë sërish kapitenin. Përballë lojtarëve që do të luajnë për Vllazninë në sezonin e ardhshëm, Licit i duhet t’u shpjegojë atyre përgjegjësinë e madhe që do të veshin këtë fanellë. Dhe jo të ndodhë si një sezon më parë me futbollistë të papërgjegjshëm, që thjesht morën rrogën duke mos u shqetësuar fare për rënien e skuadrës./panorama-sport/
