Analizë ng Ridvan TULA
Për arsye të njohjeve që kam me shumë qytetarë shkodranë, për arsye të respektimit të etikës profesionale por edhe për të shmangë debatet me tendencë me disa “gjithologë në FB”, jam mundu me kenë paksa inaktiv në lidhje me analiza apo kshilla psiko-teknike në drejtim të stafit apo lojtarëve të Vllaznisë.
Unë e di me kohë që asht faji i jem që zgjodha zanatin që çdo shqiptar mendon se e njef ma mirë se Unë, por si i thojmë *NA* shkodranët:
– “Tash m’ka ardh shpirti me dal e nuk mund të duroj ma”.
Kam lexu shumë komente nga “specialistë” apo “gjithologë të facebookut” që edhe pse afrohen te problemi që po përjeton Vllaznia, mbesin thjeshtë në nivelin e konstatuesit.
Dikush merr rolin e parashikuesit të fatit edhe pse e pafalshme profesionalisht, dikush kërkon me ulë Vllazninë me kambë në tokë por nuk difton se ku janë shkallët, dikush që ankohet për aleanca që janë absolutisht të pashmagshme, dikush që…
Zot ndihmë, ju ta nxerrni prej fundit të barkut e mandej të veni epitete nga ma idiotet!
Gjithsesi, Unë personalisht i respektoj mendimet e cilitdo qoftë sidomos kur janë të sinqerta dhe në shërbim të përparimit por kjo nuk më pengon që të analizoj, vlerësoj dhe të orientoj drejt asaj çfarë realisht duhet ba.
Për ma saktë, burimet kryesore që Vllaznia po përjeton kyt situatë janë:
– Tendenca e përgjithshme e lojtarëve tonë drejtë veprimeve individuale të panevojshme kur vihen në kontroll të topit.
– Paaftësia për të përcaktuar ritmin e saktë simbas situatave të caktuara gjatë lojës.
– Zgjedhja e rrugës ma të vështirë të mundshme për finalizimin e aksionit.
– ‘Ethet’ e kampionatit.
Efektet negative që lehtësisht përcaktohen edhe me nji fjali të vetme: Vllaznia asht tu mujt vedin.
Çfarë duhet me ba?
Vllaznia në mënyrë urgjente duhet të:
– Orientojë stërvitjen me ushtrime që kushtëzojnë lojën me pasime të shpejta (nji ose dy takime të topit).
– Të sigurojë një shpërndarje gjeografike në fushë nepërmjet lëvizjeve pa top që të mundësojë pasimin e shpejtë.
– Të përcaktojë saktë limitet e fantazisë apo zgjidhjes individuale të finalizimit të aksionit.
– Të jetë *Vllaznia* në fushën e lojës e jo skuadra që merr masat për t’iu kundërpërgjigjë kundërshtarit.
Nqse nuk do t’i marrin seriozisht këto sa thashë ma sipër, me përgjegjsinë ma të madhe profesionale, ju siguroj që do të dështojnë në të dy frontet për të arritë objektivin e pjesmarrjes në kupat e Europës.
Uroj që mesazhi të mbërrijë aty ku duhet.
