Vllaznia në basketboll për të reja u shpall kampion për të tretin vit rradhazi para pak ditësh. Një nga protagonistet e vajzave të koshit ishte edhe Anisa Musaja. Ajo tregon emocionet e kësaj fitoreje dhe krenarinë për të përfaqësuar Vllazninë dhe Shkodrën. Gjithashtu ajo bën një premtim se do jetë pjesë e Vllaznisë sezonin që vjen, duke mos e menduar kështu largimin nga shkodranet.
Musaja u shpreh duke thënë: “Ishte me të vërtetë një fitore emocionuese ky sukses i fundit. Realisht nuk e nisëm në mënyrën e duhur finalen, ku u gjendëm në disavantazh. Ndoshta ngaqë po luanim në shtëpi dhe përballë tifozëve tanë sikur ishim në presion për të fituar. Por skuadra reagoi shpejt dhe arritëm të përmbysnim duke fituar kështu titullin e rradhës.
Patjetër që ndoshta jemi mësuar disi me fitoret në këto vite. Por çdo sukses ka atë kënaqësinë e vet. Kemi punuar shumë me vajzat dhe trajneren, Medina Mustafa. Të cilën gjej rastin ta falenderoj për punën dhe bashkëpunimin e madh që ka pasur gjithmonë me ne lojtaret. Ky grup tani do jetë pjesë e ekipit të parë, pasi 5 nga vajzat nuk do kenë më moshën për të luajtur me të rejat.
E ardhmja ? Ëndërr dhe një eksperiencë që do doja ta provoja do ishte të luaja jashtë. Por t’ia lëmë kohës dhe së ardhmes. Unë do jem pjesë e Vllaznisë dhe të vijoj të përfaqësoj ato ngjyra që çdo shkodran i adhuron aq shumë.”
Endri ÇINARI
