Vetëm pak ditë më parë i është nënshtruar një ndërhyrje kirurgjikale në meniskun e gjurit të tij të djathtë dhe aktualisht është në periudhën e rehablimitit por Antonio Marku nuk mund të qëndrojë larg Vllaznisë. Sidomos në këto momente të vështira që ajo po kalon në këtë fundsezoni. Për këtë arsye, ai pasditen e djeshme ka qenë i pranishëm në stërvitjen e ekipit, ka marrë pjesë në analizën e zhvilluar dhe po ashtu, ka ndjekur seancën stërvitore të tij deri në fund të saj.
Kuptohet që ky sezon ka marrë fund për të sepse i duhet edhe të paktën dy- tre javë për të nisur stërvitjen megjithatë ai është gjithnjë pranë ekipit për t’i dhënë mbështetjen e duhur shokëve të tij. Kemi të bëjmë me një sportist model për nga sjellja por edhe ajo që ka dhënë gjithnjë në fushën e lojës, madje duke sakrifikuar jo pak në shumë ndeshje të zhvilluara. Këtë sezon në fakt ka qenë më shumë i pafat sesa duhej. Nëse sezonin e mëparshëm ishte futbollisti me më shumë ndeshje të zhvilluara tek kuqeblutë, në këtë aktualin si rrjedhojë e dëmtimeve të njëpasnjëshme, ai ka luajtur më pak duke menduar që ta shtynte ndërhyrjen kirurgjikale por ajo nuk mund të shtyhej më dhe prandaj tashmë është realizuar me sukses. Padyshim që rikthimi i tij në stërvitje me ekipin do të jetë i shpejtë sepse koha e rikuperimit nuk do të jetë e madhe megjithatë sezoni është mbyllur për të duke shpresuar që bashkë me të, të kenë ikur edhe problemet e dëmtimeve.
© shkodrasport.com
