Për shumë vite me rradhë ka qenë një futbollist model në fushën e lojës. Ndonëse nuk u ngjit asnjëherë në nivele shumë të larta, Arber Shytani gjithnjë ka qenë një lider në skuadrat ku ka luajtur.
E nisi karrierën tek Vllaznia por duke mos gjetur shumë hapësira, kaloi më pas në disa skuadra.
Duke filluar nga Ada, Tërbuni, Besëlidhja për shumë vite ndërsa në sezonin e fundit ka qenë pjesë e Tërbunit të Pukës. Në moshën 33 vjeçare duket se ka vendosur t’i thotë “mjaft” futbollit të luajtur.
Por Shytani nuk ka ndër mend të largohet nga kjo lojë magjike. Për këtë arsye, ai ka nisur tashmë zanatin e trajnerit.
Ka startuar tek “Djelmënia shkodrane” ku ka marrë drejtimin e ekipit U-17. Me siguri që edhe punën e trajnerit, do ta bëjë po aq mirë sa ç’ka bërë atë të futbollistit.
Natyrisht që nuk kemi dyshime për këtë sepse kemi të bëjmë me një djalë të shkolluar i cili ka se çfarë t’u mësojë të rinjve.
© shkodrasport.com
