Një nga më të mirët në fushë në ndeshjen e parë gjysmëfinale Vllaznia-Dinamo ishte edhe Ardit Krymi. Në përfundim të takimit, ai dha edhe një prononcim për “Panorama Sport”, ku theksoi se ekipi zhvilloi një lojë të balancuar, por mund të kishte tentuar më tepër. Megjithatë, mesfushori thekson se gjithçka ngelet e hapur për kualifikimin dhe se Vllaznia do përpiqet deri në fund për suksesin.
Krymi, vetëm barazim në ndeshjen e parë, të kënaqur?
Realisht ishim përballë një prej ekipeve më të mira të kampionatit. Besoj se ishim të balancuar mirë dhe dihet që diferencat mes ekipeve shqiptare janë të vogla. Në fund, mund të them që e rëndësishme është që nuk u mposhtëm dhe gjithçka ngelet e hapur.
Mund të bënte diçka ndryshe Vllaznia?
Ndoshta duhet të shfrytëzonim atë momentin e mirë të 15 minutave të para të pjesës së dytë, ku kishim dy-tri mundësi shënimi, aty mund të kishim provuar për të arritur diçka më tepër, mendoj.
Një rezultat i tillë lë gjithçka të hapur. E gatshme Vllaznia për kualifikim në kthim?
Rezultati vetë lë gjithçka pezull, ne duhet të përgatitemi sa më mirë dhe uroj të kemi ekipin e plotë në ndeshjet e ardhshme. Besoj se shanset janë të barabarta, 50 me 50 për secilën skuadër.
Kupa apo kampionati më i rëndësishëm për kuqeblutë?
Çdo ndeshje është e rëndësishme për ne. Në kampionat duhet të synojmë të renditemi sa më lart. E po ashtu në Kupë, tashmë edhe dy ndeshje kanë ngelur nga përfundimi i kompeticionit, prandaj duhet “gazi” në maksimum deri në fund dhe në çdo ndeshje.
Bylis në fundjavë në kampionat, e vështirë?
Shumë ndeshje e fortë, sepse për Bylisin është “jetë a vdekje”. Por edhe ne kemi objektivat tanë dhe udhëtojmë drejt Ballshit për një rezultat pozitiv.
