Kukësi pësoi një humbje në Kupën e Shqipërisë ndaj Apolonisë ndërkohë që nesër luan ndeshjen e radhës në kampionat ndaj Laçit. Verilindorët e drejtuar nga Cungu renditen në vendin e dytë dhe vetë tekniku shkodran, është shprehur se humbja ndaj Apolonisë i ka bërë mirë skuadrës. Sa i përket gjendjes së skuadrës, ai ka folur për mungesat, ndërkohë që është ndalur pak më gjatë te Shafik Tigruxha, që erdhi me bujë por ka një problem shëndetësor me muskujt e barkut.
“Humbja me Apoloninë? Sa i përket asaj ndeshjeje e kam thënë se në njëfarë mënyre dhe duke reflektuar ishte shuplakë e mirë për ne për të na rikthyer me këmbë në tokë. Futbolli luhet me ushtarë dhe duhet të jemi gjithmonë ashtu dhe në atë mënyrë u soll Apolonia. Ishte mundësia ideale për të humbur pasi erdhi në kohën e duhur dhe kemi mundësi të reflektojmë. Nesër kemi karakter tjetër dhe duke pasur parasysh rrjedhën e kampionatit, pozicionin që kemi nesër hyjmë për të fituar ndeshjen.
Gjendja? Kemi lojtarë që i kanë kaluar ose jo, por kemi edhe nga ata që kanë shfaqur. Kam kontingjent që mund të alternoj lojtarët dhe lojtarë që mund të bëjnë disa pozicione. Kjo na ndihmon por e rëndësishme është që kushdo që zbret në fushë të japë më të mirën.
Titulli kampion? Sondazhet janë mendime që i respektoj dhe do ta isha i kënaqur që askush të mos na llogariste por të vazhdonim punën tonë. Nuk më pëlqejnë të folurat në media, por dua vetëm të flasim në fushë.
Objektivat? Nuk them se Kupa nuk është objektiv pasi do të luftojmë në të dyja frontet. Çdo ekip ka një objektiv ku fokusohet më tepër, por kjo nuk do të thotë që nuk e kemi Kupën me rëndësi.
Merkatoja? Klubi ka menduar dhe ka pasur nevojë për ndërhyrje por mua nuk më pëlqejnë shumë ndërhyrjet pasi krijojnë oshilacione dhe nëse vijnë lojtarë në janar, duan kohë për t’u përshtatur. Krijohen situata pa ekuilibër, por kemi afruar dy lojtarë cilësorë që kanë bërë mirë me Luftëtarin, por këto është ekip tjetër me objektiva të tjera dhe ka presion pozitiv pasi duhet të jesh i përgatitur.
Shpresoj që edhe këta lojtarë të bëhen shpejtë pjesë e skuadrës. Sa më shumë konkurrencë dhe profesionista të ketë, aq më mirë do të ishte dhe nëse futbollistët janë profesionista, do të ishte më shumë luks dhe të jep alternativa të shumta.
Rroca-Shkurtaj? E thashë edhe më parë që kanë bërë mirë në ekipet e tyre dhe këtu është ekip tjetër. Uroj që të përshtaten shpejtë dhe kanë bërë shumë progres e rritje megjithatë kjo duhet të shihet pasi kanë kualitete të mira dhe jo pa qëllim mendoj se ishin goditje. E njohin lojën e tyre mirë dhe Rexhinaldo e njeh lojën e tyre pasi ka qenë te Luftëtari. Duhet të jemi koshient që edhe ata e duan kohën e tyre. Nuk duhet t’i vëmë në presion pasi çdo gjë do kohën e tyre.
Terreni në Kamzë? Falënderoj drejtuesit e Kamzës që na mundësuan që ndeshjet t’i luajmë deri në fund të sezonit atje pasi djemtë fokusohen tashmë vetëm në një fushë. Kukësi luan futboll dhe nëpërmjet kësaj loje duhet të godasim, por fusha e Kamzës është pak problematike, megjithatë duhet ta pranojmë këtë vendim të klubit.
Shafik Tigruxha? Sa i përket cilësive nuk janë vënë kurrë në dyshim,. Unë si trajner e kam parë dhe ka shumë futboll e potencial. Ishte armë e fortë për ne dhe ndjej keqardhje e vetë ai është i mërzitur. Ne kishim llogaritur projekt afatgjatë me këtë futbollist e megjithatë, futbolli është i tillë. Duhet të shohim më para pasi kemi lojtarë dhe shyqyr që erdhi Rroca pasi kompleton mungesën e Shafik.
Kërkohet ndërhyrje kirurgjikale për të dhe nëse do të isha në rolin e tij do të pranoja dhe në verë të isha i gatshëm. Nëse e bën në verë, humbet edhe sezonin tjetër. Nëse qëndron ose jo te Kukësi, duhet folur me drejtuesit. Unë dua që të qëndrojë te Kukësi, qofsha ose jo unë trajner i Kukësit. Një zog kur vjen në dorë, nuk duhet të lihet që të ikë”, u shpreh Cungu. /VipSport/
