Shqipëria mbylli ditën e djeshme ndeshjet zyrtare të Nations League duke fituar me rezultatin 3-2 ndaj Bjellorusisë. Kuqezinjtë e mbyllin grupin C në vendin e parë dhe në Nations League e radhës do të luajnë në Grupi B.
Në një intervistë për “Sport news” në Neës 24, presidenti Armando Duka ka folur për këtë sukses të Kombëtares, trajnerin Reja, objektivin e radhës të Kombëtares. Gjithashtu numri një i futbollit shqiptar foli edhe nëse do të ketë një ndalesë të dytë të futbollit në vendin tonë prej pandemisë apo jo.
“Duhet të jemi të lumtur që I përfunduam këto ndeshje duke parë situatën kaotike nga virusi. Kishim vetëm 18 lojtarë në dispozicion nga dëmtimi dhe virusi, por duhet të jemi të lumtur që dolëm në vend të parë.
Grupi ishte me skuadra të barabarta dhe mund të kishim më mirë dhe të merrnin më shumë pikë, por fituesi nuk gjykohet. Ne shqiptarët kaluam një tërmet dhe nuk jemi njësoj si vendet e tjera. Ta konsiderojmë këtë një sukses për Shqipërinë dhe kryesisht për futbollin tonë”.
Kusht Rejas për vendin e parë? “Në mendjen time nuk i ka vënë kushte asnjë trajneri për një rezultat të vetëm. Marrëdhënia me një trajner shihet në vazhdimësi se çfarë bën mirë apo keq e pastaj është rezultati që vendos. Nuk kam qenë në dyshim që Reja ka bërë mirë në Shqipëri dhe do të vazhdojë të jetë në krye të skuadrës”.
Objektivi? “Objektivi jonë më madhor është pjesëmarrja në Euro 2024 që është e arritshme. Ne duhet të marrim rezultate maksimale, kjo nuk do të thotë që nuk do të luajmë mirë në ndeshjet kualfikuese të botërorit.
Ne do të luajmë të gjitha mundësitë tona, por objektivi jonë maksimal është Europian 2024 duke parë që për botëro vendi i parë është pothuajse i paarritshëm. Gjatë këtyre ndeshjeve që zhvilluam pamë Çepelen një 17-vjeçar që luajti titullar ndaj Kosovës dhe shumë të tjerë e kjo tregon që jemi një skuadër e re”.
Skema e trajnerit Reja? Jo vetëm Reja, por çdo trajner që vjen këtu është me fat pasi jemi vetëm 3 milionë banorë dhe të gjithë janë trajnera dhe japin mendimin e tyre. Para ndeshjes mendon se ky është formacioni më I mirë, por në fund rezultati të jep apo jo të drejtë”.
Deklarata e Braçes për fushën e “Air Albania”? “Nuk kam pasur kohë të dëgjoj asnjë nga këto. Fusha nuk është në gjendjen e duhur për arsye objektive dhe stadiumi është i mbyllur e me vështirësi merr rreze dielli.
Ne kërkuam bar natyral duke parë klimën që kemi, por do ta ndryshojmë fushën duke e bërë fushë hibride. Ka vende që e kanë fushën optimale dhe e ndryshojnë 2-3 herë në vit, por ne nuk e kemi këtë luks”.
Sërish ndalesë të futbollit shqiptar prej pandemisë? “Aktivitetet Kombëtare përfunduan e do të rikthehen në mars dhe uroj që të kemi tifozë në atë kohë. Përsa i përketë kampionateve të tjera deri tani ka disktutime të ndryshme në Europë, në Shqipëri jo dhe shpresoj të mos kanosemi nga kjo ndërpreje. Shpresoj që situata të mos arrijmë deri aty pasi kryesorja është shëndeti i lojtarëve e më pas futbolli”.
