Prej janarit të vitit 2012 kur është larguar nga Vllaznia ka ndërruar disa skuadra, por duket se mendjen e ka sërish aty. Bëhet fjalë për mesfushorin shkodran Armando Vajushi. Aktualisht është duke u stërvitur në Rumani me ekipin Botosani dhe pritet që këto ditë të firmosë kontratën me të.
Megjithatë nostalgjia për skuadrën e zemrës duket se vazhdon të jetë ende prezent tek ai. Për këtë arsye, ditën e sotme Vajushi ka postuar në profilin e tij një foto të para disa viteve kur ai nga sa shihet është në një grumbullim me disa prej futbollistëve të Vllaznisë së asaj kohe dhe pikërisht me Elvin Beqirin, Ervis Krajën dhe Florind Bardullën si dhe me fizioterapistin Ilirjan Haxhaja.
Duhet thënë se Vajushi është nga ata lojtarë i cili ka qenë shumë i lidhur me ngjyrat kuqeblu dhe jo më kot, pavarësisht ofertave që pat pasur para se të largohej nga Vllaznia, iu përgjigj se largohej vetëm jashtë vendit dhe në asnjë ekip tjetër shqiptar.
Dhe kështu ndodhi. Ai firmosi fillimisht me Liteks në Bullgari, më pas kaloi tek Chievo në Itali dhe kështu me rradhë në disa skuadra të tjera. Së fundmi mund të luajë me Botosani në Rumani. Gjithsesi, Vllaznia është gjithmonë aty, në zemrën e tij.
© shkodrasport.com
