Armir Grima po përjeton emocione të ndryshme në karrierën e tij sportive. Deri në fund të korrikut ka qenë në fushë, më pas drejtor sportiv ndërkohë që nga e hëna e kësaj jave është edhe trajner tek Vllaznia. Ndonëse i përkohshëm, sigurisht që kjo përbën një kënaqësi për të sepse mbi të gjitha është vlerësim nga ana e drejtuesve të klubit që ia kanë besuar një gjë të tillë. Megjithatë ai vetë nuk e konsideron ndonjë kënaqësi të madhe këtë gjë. “Janë vetëm 30-40 ditë që do jem në këtë post për t’u rikthyer më pas sërish në postin tim, atë të drejtorit sportiv. Unë kuptohet që jam në shërbim të Vllaznisë dhe prandaj pranova ta drejtoj skuadrën në këto ndeshjet e fundit të kampionatit pas vendimit për shkarkimin e Vatës. Skuadrën e njoh sepse kam qenë deri para disa muajsh lojtar I saj ndërkohë që edhe këto muajt e fundit sërish kam qenë pranë. Ajo që premtoj unë është të bëj më të mirën në këtë periudhë kur unë do jem trajner I saj”- ka thënë ai. Por menjëherë pas këtyre fjalëve pas emërimit, vetë Grima “bën gati” edhe largimin nga ky post në fund të këtij sezoni.”Dua ta mbyll këtë sezon, këta ndeshje që kanë mbetur deri në fund të tij dhe do tërhiqem në pozicion tim. Mendoj se nuk ka ardhur ende momenti që unë të jem trajner I kësaj skuadre. Nuk jam ende gati për ta bërë një gjë të tillë dhe mund të ketë njerëz të tjerë që do ta marrin përsipër këtë gjë”-ka thënë ai.
www.shkodrasport.com
