Trajneri i Kombëtares së femrave, Armir Grima, në një lidhje direkte me emisionin “Rubrika Sportive” në RTSH, ka deklaruar: “Ndodhemi në një grup shumë të vështirë, me kundërshtarë të fortë.
Kemi një sfidë të rëndësishme, përpara është Portugalia, shpresojmë të bëjmë një ndeshje të mirë, përse jo të bëjmë dhe një surprizë. Pavarësisht kushteve të diktuara nga pandemia, jemi optimistë”.
“Fitorja me Qipron na ka dhënë një shtysë të madhe. Ishte shumë e rëndësishme për vajzat, nuk jemi mësuar të shikojmë fitore të tilla(Shqipëri-Qipro 4-0)”.
Armir Grima, futbollistja Mimoza Hamidi dhe përgatitësi atletik i kombëtares, Alban Shala i janë nënshtruar të shtunën testeve Covid-19 me tampon dhe kanë rezultuar negativë.
Zyra e shtypit në FSHF bën me dije se po të shtunën kanë bërë tamponët i gjithë delegacioni i kombëtares së femrave që do të nisej për në Portugali, për ndeshjn e radhës të eliminatoreve të Europianit.
Pas marrjes së përgjigjeve të analizave, bëhet me dije se futbollistja, Ezmiralda Franja dhe zv.trajneri Elis Legata kanë rezultuar pozitivë me Covid-19. Të dy anëtarët e kombëtares janë karantinuar menjëherë dhe janë në gjendje të mirë shëndetësore.
