Kombëtarja U-16 e Shqipërisë ka marrë pjesë së fundmi në një turne ndërkombëtar në San Marino ku sot madje, me fitoren e fundit ndaj ekipit vendas ka arritur të shpallet fitues i kësaj kupe.
Një nga pjestarët e këtij ekipi dhe që ka dhënë kontributin e tij në këtë sukses është edhe lojtari i Akademisë Vllaznia Arsen Elbasani.
Ai ka qenë në fushë si titullar në takimin e sotëm duke ndihmuar në arritjen e fitores 3-1 të kuqezinjve tanë.
Po kush është Arsen Elbasani? I datëlindjes 28 shkurt 2002, Arseni e ka nisur futbollin që në moshën 7 vjeçare.
Ai është inkuadruar tek KF Shkodra me ekipet e të cilit luan deri në vitin 2016. Më pas kalon tek Akademia Vllaznia ku natyrisht që po spikat me paraqitjet e tij tek ekipi U-16.
Grumbullimi i tij me kombëtaren e kësaj moshe padyshim që është një nxitje për karrierën e tij të mëtejshme.
Luan si mesfushor dhe spikat me paraqitjet e tij. Këto të dhëna e bëjnë atë një futbollist të perspektivë por kjo padyshim që nuk do të thotë se Arseni duhet të ulë ritmin e punës.
Përkundrazi, duke qenë element i spikatur tek ekipi i Vllaznisë dhe për më tepër edhe kontigjent i ekipit kombëtar, duhet të vijojë të punojë edhe më fort për të rritur performancën e tij.
Vllaznia duket se po fiton gradualisht nje mesfushor cilesor per te ardhmen e saj.
Gjergj KOLA
