Mesfushori i njohur shkodran Arsen Hajdari mund të rikthehet sërish tek Vllaznia. Ai në gjashtë muajt e fundit ka tentuar të luajë në futbollin italian por nuk ia ka dalë dot dhe për këtë arsye, është rikthyer sërish në Shkodër. ditën e djeshme madje ka dalë në stërvitje me kuqeblutë dhe ka luajtur në ndeshjen miqësore që ata kanë zhvilluar me ekipin U-19 të Akademisë Vllaznia. Forma e tij përgjithësisht dukej e mirë megjithatë do jetë stafi teknik që do ta testojë edhe për disa ditë të tjera, para se të marrë vendimin përfundimtar për të. Hajdari kujtojmë se para 2-3 sezonesh, ka qenë një nga emrat më të spikatur të mesfushës shkodrane por edhe të kampionatit shqiptar. Por disa momente jo të mira që kaloi, e bënë atë të largohej nga Vllaznia dhe sezonin e kaluar të luante me Besëlidhjen e Lezhës ndërsa më pas, provoi edhe futbollin italian. Gjithsesi tani është rikthyer dhe ndoshta mund të jetë një alternativë më shumë për skuadrën shkodrane, për më tepër që ka mbetur një vend bosh në mesfushë pas largimit të kosovarit Hoxha sepse Hajdari luan pikërisht në të njëjtin pozicion. Megjithatë nuk duhet ngutur. 27 vjeçari e ka vetë në dorë këtë gjë. Nëse arrin të bindë Cungun, vendin tek Vllaznia e ka gati. Por ndërkohë, në miqësoren e djeshme, me skuadrën shkodrane është aktivizuar në pjesën e dytë edhe një lojtar 19 vjeçar i ardhur nga Italia. Bëhet fjalë për një futbollist me origjinë shkodrane i cili luan si sulmues. Quhet Adriano Qosaj dhe paraqitja e tij e parë me kuqeblutë ka qenë e mirë, madje ka shënuar edhe gol por kjo nuk do të thotë se e ka të sigurtë firmosjen me ta. Përveç këtyre dy futbollistëve, në ditët e para të janarit në Shkodër priten të vijnë edhe lojtarë të tjerë për provë dhe shpresa është të gjenden lojtarët e duhur për gjysmën e dytë të sezonit.
© shkodrasport.com
