Pak ditë më parë, ai e ka bërë të ditur se do të kërkojë nga drejtuesit e klubit ta lënë të lirë të largohet meqenëse nuk është në planet e trajnerit Rudi Vata. Arsen Sykaj, ndonëse gjatë këtyre ditëve ka qenë I grumbulluar në zborin e kombëtares, sërish nuk ka ndryshuar mendim nga kjo ide e tij. Për këtë arsye, mendohet që sot, pasi ai të kthehet në Shkodër nga grumbullimi I kombëtares, të kërkojë një takim me drejtuesit e klubit për të sqaruar përfundimisht pozicionin e tij. “Sapo të kthehem sot në Shkodër, sigurisht që do të kërkoj një takim me drejtuesit e klubit. Dua të di se çfarë do bëhet me mua. Nëse vërtetë nuk jam në planet e trajnerit, do ishte mirë të më linin të largohesha”-ka thënë ai. Vetë trajneri Vata në prononcimet e tij u pat shprehur se “nëse lojtari nuk ndihet mirë tek kjo skuadër, le të largohet, por besoj se do të ketë reflektuar nga ajo deklaratë e disa ditëve më parë sepse askush nuk ka patur ndonjë problem apo gjë personale me të. Thjesht, I është thënë se nuk e ka vendin të sigurtë në formacion”. Nga ana tjetër, edhe drejtori sportiv Grima në lidhje me këtë çështje është shprehur: “Nëse Sykaj nuk dëshiron të luajë më me Vllazninë, sigurisht që Vllaznia nuk bëhet pengesë për asnjë lojtar për t’u larguar, por kjo do bëhet konform të gjitha rregullave. Por mendoj se Arseni është djalë I ri dhe mund të ketë gabuar megjithatë do ta shohim se çfarë do ndodhë në ditët në vazhdim”. Në adresë të lojtarit kanë filluar të vijnë edhe ofertat e para megjithatë ai I ka kthyer të gjitha ato mbrapsht pasi ende nuk ka sqaruar pozicionin e tij tek Vllaznia.
www.shkodrasport.com
