Gjatë ditës së djeshme, kryebashkiakja e Shkodrës dhe njëkohësisht presidentja e Vllaznisë, Voltana Ademi foli për sulmin ndaj trajnerit të Vllaznisë, Ernest Gjoka.
Ademi dënoi sulmin ndaj Gjokës dhe kërkoi më shumë mbështetje ndaj ekipit shkodran. Por, e pyetur se a kanë qenë kërcënimet ndaj trajnerit arsyet e largimit të Cungut nga drejtimi i ekipit të Vllaznisë, Ademi e mohoi një gjë të tillë.
Sipas Ademit, Cungu është larguar nga kuqeblutë për shkak të rezultateve negative dhe jo kërcënimeve në drejtim të tij.
Por, vetë ish-tekniku i Vllaznisë e ka hedhur poshtë deklaratën e kryabashkiakes Ademi.
Në një intervistë për Sport Ekspres, Cungu thotë se nuk mund të punonte në kushte të tilla, nga probleme sportive dhe politike të shumë drejtimeve.
“Unë kam pasur probleme nga më të ndryshme si sportive, politike, të shumë drejtimeve. Ika nga Vllaznia pasi nuk mund të punoja në kushte të tilla.
Nuk mund të punohet në kushte të tilla, nuk mund të marrësh rezultat. Nuk e di se kur do e kuptojnë njerëzit diçka të tillë. Vllaznia duhet të falet.
Kam qenë që në fillimet e mia këtu që kam thënë se duhet të matet mirë Shkodra, për të mos ia dhënë kujtdo Vllazninë, siç ndodhi me “GEA Sport” që e lanë në rrugë me shumë borxhe.
Është mirë që tani t’i falet Vllaznia dikujt që mund t’i dalë për zot. Nuk mund të ndodhin situata të tilla te një skuadër që ka president.
Nuk mund të afrohet askush, as te trajneri dhe as te lojtarët. Këtu mund të ndodhë çdo gjë. Kam pasur situata nga më të ndryshme, me individë, faqe, nga politika po ashtu.
Nuk kam folur për Vllazninë që kur kam ikur dhe duhet të rri sërish në një farë mënyre sërish në heshtje, për të mos e sharë Vllazninë, sepse duket sikur flas keq për familjen time.
Nuk ka dashur njeri të dëgjoja kur flisja për të tilla situata.” – është shprehur Cungu.
Ai flet edhe për mbijetesën e shkodranëve, ku shton: “Vllaznia ka shumë vite me Bashkinë që synon mbijetesën.
Vjet Vllaznia mendonte për Kupat e Europës. Duke mos pasur zot shpie nuk gjenim pikë, ndërsa skuadrat e tjera shumë pik nga ne fitonin të gjitha ndeshjet në 6 javët e fundit dhe më pas shkuam deri te gjendja në fund.
Nuk ka njerëz që rrinë mbi kokë. Kam frikë se do vazhdojë kjo situatë. I duhet dhënë shansi një privati që të Vllaznia të ketë një president.
E uroj publikisht që të vijë sa më shpejt sepse kjo situatë nuk është e mirë. Sado i aftë të jetë sado profesionistë në këto kushte nuk mund të punohet.” /ShkodraNews/
