Fushata zgjedhore ka trokitur edhe në botën e sportit. Pak ditë më parë, PD prezantoi programin për sportin, ndërsa dje ishte Kryeministri që lançoi premtimet e tij. Në studion e MCN Informacion, Artan Shyti, ish-zv.ministër Sporti, tha se për sportin flitet në mënyrë sipërfaqësore dhe nuk u jepet zgjidhje reale problemeve.
Kjo është një sëmundje e politikës shqiptare. Nuk bën një analizë të asaj që është premtuar dhe çfarë është mbajtur apo nuk është mbajtur. Pse nuk ka sot një diskutim serioz çfarë do të bëhet me ligjin e sponsorizimit?
Karakteristikë e kësaj maxhorance është superficialiteti. Për ta bërë sportin siç duhet të ulemi seriozisht dhe të përfshijmë sa më shumë ekspertë. Unë shoh që Rama e ka në vëmendje sportin por ka zgjedhur institucionet jo të duhura dhe njerëzit jo të duhur.
Ligji i sponsorizimeve është një nga elementët. Në sportin shqiptar, funksionimi është problematik. Aktiviteti i shtetit për të zgjidhur mënyrën ligjore të funksionimit të sportit është në 360 gradë. Ne kemi një situatë ku Bashkia e Tiranës e ka buxhetin mbi miliardë lekë për sportin, ndërsa shteti vetë e ka 1.7 miliardë. Flitet për sportin por në mënyrë sipërfaqësore.
