Vendi i parë dhe kupa në turneun “Citta della Pace” të Roverettos në Itali, padyshim që ka qenë një sukses për ekipin “Atletik Club Shkodra” U-13.
Ai i ka fituar të gjitha ndeshjet ndaj ekipeve kundërshtare si në grup, ashtu edhe në gjysmëfinale e finale, duke treguar një nivel të lartë loje.
Padyshim meritë e të gjithë futbollistëve dhe e stafit teknik që arriti të tregonte më së miri vlerat e futbollit shkodran dhe atij shqiptar në këtë aktivitet të përvitshëm.
Pas kthimit në Shkodër me kupën e fituesit, kapiteni i këtij ekipi Arti Bisha, për gazetën “Shkodra Sport” do të shprehej:
“Ka pasë ndeshje të vështira por edhe të lehta. Por sidomos gjysmëfinalja dhe disa ndeshje në grup kanë qenë jashtëzakonisht të vështira.
Por ne, me shumë përkushtim ia dolëm duke i fituar dhe duke e merituar vendin e parë”.
Ndërkohë i pyetur sesa do t’i ndihmojë ky trofe për karrierën e tyre të mëtejshme, Bisha do përgjigjej:
“Kjo eksperiencë e fituar ka për të na ndihmuar shumë sepse ka të bëjë me të ardhmen tonë dhe me futbollin në përgjithësi por edhe Shkodrën e bëri një vend edhe më të njohur”.
© shkodrasport.com
