Në Superligë duhen edhe 10 javë që të përfundojë sezoni 2017-2018 dhe tashmë çdo ndeshje është një ‘betejë’ për të gjithë.
Luftë e fortë parashikohet mes dyshes Vllaznia-Teuta. Shkodranët dhe durrsakët duket se do ndajnë mes tyre ekipin që do i bashkohet Lushnjes në Kategorinë e Parë sezonin që vjen.
Vetëm një pikë i ndan dy ekipet në renditje ku kuqeblutë numërojnë 27 pikë ndërsa ‘djemtë e detit’ 26 pikë.
Me një ndeshje direkte që do luhet mes tyre në Durrës duket se gjithçka është e hapur dhe pritet të ketë të papritura.
Por si gjithnjë në Shqipëri dhe si për çdo fushë e temë të jetës në vendin tonë ka një ‘personazh të tretë’ që do përfishhet në garën e mbijetesës.
Shumë mund të mendojnë se dhe Kamza është në këtë valle të mbijetesës pasi ata kanë 34 pikë dhe asgjë nuk është e sigurtë.
Në këtë luftë për mbijetesë nuk mund të përjashtojmë as ekipin e Ndreut, por ata nuk janë të vetmit që mund ti bashkohen garës për mbijetesë.
Në këtë ‘luftë’ pritet të hyjë edhe Skënderbeu. Mund të tingullojë si çmenduri ose fantashkencë, por ndoshta në fund të kampionatit nuk do jetë aspak e tillë.
Korçarët që janë nën hetim nga UEFA për skandalin e basteve në fund të sezonit mund të dënohen dhe një dënim mund të vijë edhe nga FSHF kjo e imponuar nga UEFA që bardhekuqtë të rrëzohen një kategori më poshtë për sezonin si vjen ashtu siç ndodhi me Juventusin në vitin 2006 në Itali ku bardhezinjtë u dënuan për skandalin e basteve që plasi në Apenine.
Në Shkodër dhe në Durrës po e mendojnë një skenar të tillë dhe në fund të sezonit shpresojnë që të mbijetojnë të dy ekipet pavarësisht se mund të mos kenë merita sportive për ta arritur diçka të tillë.
Deri atëherë lufta do jetë e ashpër për mbijetesë dhe një vendim për Skënderbeun mund të merret para përfundimit të kampionatit, por gjithsesi asnjë skenar nuk përjashtohet deri në përfundimin e kampionatit në datën 18 maj. /Newsport/
