Boksieri shkodran Asmer Bilali ka dhuruar një ndeshje shumë interesante në turin e dytë kualifikues të turneut që është duke u zhvilluar në Trabzon të Turqisë. Ai është ndeshur mbrëmë me boksierin gjeorgjian Zal Kvaçatadze, i cili në kampionatin Europian të vitit të kaluar, ka zënë vendin e tretë në Europë duke merituar medaljen e bronztë. Pavarësisht këtij fakti, shkodrani Bilali ka zhvilluar një ndeshje të përkyer duke e fituar atë me rezultatin 18-17. Ndeshja ka qenë në dyshim deri në sekondat e fundit madje, përcaktues në fitoren e boksierit të Vllaznisë ka qenë pikërisht raundi i tretë. Siç na njofton nga Turqia, zëvendëstrajneri i ekipit tonë kombëtar Jozef Sermi, pas raundit të dytë, Bilali ka qenë në disavantazh me dy pikë nga kundërshtari i tij gjeorgjian por në raundin e fundit, ai ka bërë një boks të shkëlqyer duke fituar në fund me një pikë dhe duke merituar në këtë mënyrë të drejtën për të kaluar në turin tjetër, pikërisht në tetëshen e më të mirëve. Në këtë tur të peshës 69 kg, Asmer Bilali do të ndeshet të mërkurën me rumunin Ionut George, ndeshje që do zhvillohet nesër.
www.shkodrasport.com
