Tre amerikanët e ardhur tek Vllaznia së fundmi kuptohet që e kanë ndryshuar disi klimën në skuadër. Basketbollistët e ardhur nga kontinenti i largët kanë sjellë njëkohësisht më shumë shpresë për shpëtim tek kuqeblutë. Megjithatë jo të tre ata duken se janë të një niveli të lartë.
Të paktën nga ajo që u pa në ndeshjen me Teutën, më i miri nga të tre ishte lojtari me numrin 1, Austin Christophet Dasent. Ai u dallua në lojën e tij, një lojtar me vlera që binte në sy dhe jo vetëm me gjuajtjet e tij brenda zonës por edhe ato trepikëshe. Statistikat janë shumë të mira për të.
Ka shënuar 5 trepikësha nga 9 gjuajtjet që bëri jashtë zone, ka shënuar 3 nga 7 gjuajtjet brenda zone dhe po ashtu, ka shënuar 4 nga 7 gjuajtjet e lira. Në total ka shënuar 25 pikë në këtë ndeshje, duke qenë edhe pikëshënuesi më i mirë i ndeshjes, përfshi këtu edhe lojtarët e Teutës.
Dasent mori në fakt edhe vlerësimet e stafit dhe basketbollistëve të Teutës. Sa për dy amerikanët e tjerë të Vllaznisë, pritshmëria nuk ka qenë ndoshta aty ku pritej. Lojtari play-maker Malik Charter ishte shumë teknik por nganjëherë e tepronte me mbajtjen e topit.
Ndoshta gjërat do të ndryshojnë për mirë tek ai në të ardhmen pasi të ambjentohet me basketbollin shqiptar dhe Charter mund të shndërrohet edhe ai në një lojtar të rëndësishëm për Vllazninë. Megjithatë edhe për të shifrat ndaj Teutës nuk kanë qenë të këqija sepse ka shënuar 18 pikë dhe është pikëshënuesi i dytë më i mirë i ndeshjes pas Dasent.
Ndërkohë qendra Michael Hundley ishte ndryshe nga çfarë jemi mësuar të shohim me lojtarët e këtij pozicioni që kanë përgjithësisht pesha të rënda trupore. Gjithsesi edhe Hundley ndaj durrsakëve shënoi 5 pikë. Në total tre amerikanët shënuan sëbashku 48 pikë, ndërsa 8 pikët e tjera për Vllazninë u shënuan nga Rakaj (4), Llazani (3) dhe Lekndreaj (1).
Amerikanët shihet qartë se tashmë janë shndërruar në elementë të rëndësishëm për ekipin dhe në ndeshjen e parë me ekipin kuqeblu shënuan të tre sëbashku 85 % të pikëve të tij, por mbase atyre duhet t’u bashkohen edhe lojtarët shkodranë që duhet të rrisin performancën e tyre në mënyrë që ekipi të arrijë objektivin që ka.
© shkodrasport.com
