Ditët e fundit në çdo media është bërë prezente kërkesa e biznesmenit Alban Xhaferi për të marrë administrimin e Klubit të Futbollit Vllaznia. Shumica e sportdashësve dhe jo vetëm, kanë shprehur dëshirën që kjo të ndodhë, në mënyrë që skuadra kuqeblu më pas të mos i ketë këto problemet që ka sot.
Kërkesa e Xhaferit në Bashkinë Shkodër tashmë ka mbërritur, por duket se marrja e një përgjigje pozitive nuk është dhe aq e lehtë. Presidenti aktual i basketbollit të Vllaznisë, kërkon përfshirjen në aksionet e klubit, por duket se një gjë e tillë është e pamundur në këto momente.
Një gjë të tillë e ka bërë të ditur avokati i njohur Apolloni Haxhi, i cili është marrë këto vitet e fundit hollësisht me studimin e ligjit për privatizimin e klubeve të futbollit dhe e njeh mirë procedurën që duhet ndjekur. Ai ka qenë i ftuar në emisionin “Sport Aren” teksa ka shpjeguar gjithçka në lidhje me këtë çështje:
“Kam dëgjuar dhe lexuar për një shkresë që presidenti i basketbollit të Vllaznisë Alban Xhaferi i ka bërë Bashkisë Shkodër për të marrë administrimin e Klubit të Futbollit Vllaznia. Nga ajo çfarë kam konstatuar unë, z. Xhaferi dëshiron të hyjë tek aksionet e Vllaznisë, por kjo është e pamundur.
Unë nuk e di kush ia ka sugjeruar sepse edhe kur tenton që një pjesë të aksioneve t’i tjetërsosh apo t’i shesësh, ka një procedurë. Duhet bërë mbledhja e Këshillit Bashkiak, përcaktohet vlera nominale e aksioneve e pastaj me rradhë të gjitha veprimet e tjera. Kur nuk ndiqet kjo procedurë, të gjitha këto veprimet e tjera janë fallso për mua.
Po nuk u bë procedura e rregullt, asnjë veprim nuk mund të kryhet. Duhet bërë mbledhja e Këshillit Bashkiak, marrja e vendimit se duam të shesim kaq për qind të aksioneve, vlera nominale e aksioneve është kaq etj, etj. Kuptohet që e mira do të ishte që klubi të privatizohet sa më parë, por duhet ndjekur kjo procedurë. Edhe më përpara ka ardhur Rudi Vata me disa koreancë, mund të kenë ardhur edhe të tjerë dhe kanë takuar kryetaren e Bashkisë, por këto janë lëvizje të kota.
Fillimisht duhet të nisë procesi dhe pastaj mund të shfaqet interesi nga biznesmenët dhe të bëjnë ofertat e tyre. Procesi i privatizimit nuk është punë e lehtë për t’u kryer. Fillimisht aksionet i nxjerr në shitje Këshilli Bashkiak Shkodër, aprovohet nga Ministria që mbulon sportin dhe në fund Ministria e Ekonomisë hap ankandin për ofertuesit.
Them se është një procedurë e gjatë, bazuar në ligjin e shoqërive tregtare, por e rëndësishme është fillimisht të nisë si proces sepse pastaj rrugës mund të rregullohen të gjitha gjërat e tjera”.
© shkodrasport.com
