Komiteti Drejtues i Federatës Shqiptare të Peshëngritjes në mbledhjen e tij të fundit ka bërë të ditur edhe emrat e sportistëve me të cilët do përfaqësohet Shqipëria në Lojërat Mesdhetare që do të zhvillohen muajin e ardhshëm. Më konkretisht këto Lojëra siç dihet do të zhvillohen në Mersin të Turqisë në datat 20-30 qershor. Duket se peshëngritja shqiptare do të përfaqësohet në këtë aktivitet të rëndësishëm me 10 sportistë. Ndër to janë edhe dy shtangistët e Vllaznisë Xhulio Prroni që do konkurrojë në peshën 85 kg dhe Isa Bala në peshën +105 kg.
Njëri nga trajnerët e kombëtares sonë do të jetë edhe shkodrani i mirënjohur Sokol Bishanaku. Shpresa sigurisht që ka përsëri për medalje tek peshëngritësit tanë të cilët po kalojnë një formë të mirë sportive. Ata vijnë pas Kampionatit Europian që u zhvillua muajin e kaluar në Tiranë dhe tashmë janë grumbulluar për në Lojërat e Mesdheut. Për fat të keq do mungojë në këto Lojëra peshëngritësi i talentuar Erkand Qerimaj të cilit i mbaron pezullimi në fillim të muajit korrik. Pra ai është “djegur” për këtë pjesmarrje vetëm për pak ditë, çka do të thotë edhe një mundësi më pak për kombëtaren tonë për medalje sepse Qerimaj po kalon një formë shumë të mirë sportive.
www.shkodrasport.com
