Ndër 12 sportistët e zgjedhur nga Federata Shqiptare e Peshëngritjes për të përfaqësuar vendin tonë në Kampionatin Europian që do zhvillohet javën e ardhshme në Tiranë, janë edhe dy peshëngritës shkodranë. Bëhet fjalë për Isa Balën që do konkurrojë në peshën super të rëndë +105 kg dhe Xhulio Prroni që do konkurrojë në peshën deri në 85 kg. Përzgjedhja e sportistëve është bërë pas disa testimeve të bërë ditët e fundit duke nxjerrë kësisoj 12 më të mirët sipas rezultateve nga 50 të grumbulluarit që kanë qenë në Durrës.
Ndërkohë, bashkë me dy sportistët e Vllaznisë do jetë edhe njëri prej trajnerëve të saj, pikërisht Zef Kovaçi ndërkohë që nuk mungon edhe një shkodran që punon prej vitesh në Tiranë, pikërisht Sokol Bishanaku. Kampionati Europian do zhvillohet këtë vit në Tiranë në datat 8-14 prill dhe pritet një paraqitje e mirë e sportistëve tanë. Ka shpresa edhe për medalje për ndonjërin prej tyre, kryesisht Romela Begaj megjithatë e rëndësishme është që peshëngritjes shqiptare t’i kthehet edhe njëherë imazhi i ri pas disa vendimeve që ajo mori me pezullimin e sportistëve dhe gjobitjen nga Federata Europiane. Kampionati Europian është një eveniment shumë i madh dhe sigurisht që realizimi i tij në vendin tonë është një plus për të, edhe për t’i treguar vendeve të tjera se dimë të organizojmë të tilla evenimente të rëndësishme.
www.shkodrasport.com
