“Derbi” shkodran i play-off-it të 17 vjeçarëve, ai në mes Basania dhe Scutarit është mbyllur në barazim 2-2 në një ndeshje që ka prodhuar një futboll të bukur dhe shumë emocione.
I vlefshëm për javën e parë të play-off, ky takim është luajtur në Pezë- Helmes dhe në dy momente ka qenë ekipi i Scutarit që ka kaluar në avantazh, por në të dy rastet ka arritur të barazojë Basania.
Fillimisht ka shënuar Hagrepi për Scutarin në minutën e 7-të duke krijuar kësisoj epërsinë për skuadrën e drejtuar nga trajneri Erjon Hasaj. Megjithatë 5 minuta para fundit të pjesës së parë, Basania do të fitonte një 11-metërsh që është kthyer në gol nga futbollisti Lluka.
Në këtë mënyrë, pjesa e parë është mbyllur në barazim 1-1. Në të dytën ka qenë sërish Hagrepi që në minutën e 71-të ka shënuar golin e dytë për Scutarin dhe kjo krijoi idenë se mund ta fitonte ndeshjen, por nuk do të ndodhte kështu.
Në minutën e 80-të do të barazonte Puka dhe në këtë mënyrë i gjithë takimi u mbyll në barazim 2-2. Një rezultat ky që tregon se këto dy ekipe do të jenë konkurrentë të fortë deri në fund për të zënë dy vendet e para që i çojnë në kategorinë superiore të kësaj grupmoshe./SHKODRA-SPORT.COM/
