Valter Fushaj pritet të jetë kandidati I vetëm në lojë për të marrë drejtimin e Vllaznisë. Kjo pas përgjigjes negative që Bashkia Shkodër pritet t’I kthejë kompanisë zviceriane “Gea Sport” që kishte shfaqur interes për të marrë administrimin e klubit shkodran. Në fakt pritej që ditën e nesërme të vinte edhe përgjigja përfundimtare për zvicerianët sepse ata kanë kërkuar pikërisht më 12 qershor një vendim nga ana e institucionit të pushtetit lokal në Shkodër. Por meqenëse “Gea Sport” në atë çfarë kërkon, dëshiron që të administrojë vetëm ajo klubin, kjo nuk është pranuar nga ana e Bashkisë.
Pikërisht për këtë, pritet që nesër kryebashkiaku Luka t’I kthejë mbrapsht njëherë e mirë zvicerianët.Për këtë arsye, ditën e sotme, nuk ka patur një përgjigje nga ana e këtij institucioni, e kjo do të thotë se nuk ka patur diçka pozitive. Në rrethana të tilla, kandidati I vetëm që mbetet në lojë për të marrë Vllazninë, mbetet ish- presidenti Valter Fushaj. Ai I ka vënë kushtet e tij Bashkisë dhe pritet që tashmë ky institucion t’I marrë në shqyrtim ato dhe të vendosë se çfarë do bëjë. Fushaj ka kërkuar që të mos ketë të bëjë fare me borxhet aktuale që ka klubi dhe përpos kësaj, kryebashkiaku t’I premtojë miratimin e një shume financiare për pjesën e mbetur të vitit. Burime pranë ish- presidentit bëjnë të ditur se përkrah tij në këtë nisëm janë edhe 2-3 biznesmenë të tjerë dhe sëbashku ato mund të marrin përsipër drejtimin e klubit. Megjithatë asgjë nuk ka përfunduar. Ndoshta Brenda disa ditësh kjo çështje do të marrë zgjidhje në mënyrë që vendimi përfundimtar pastaj të merret në mbledhjen e Këshillit Bashkiak në fund të muajit qershor.
www.shkodrasport.com
