Gati dy javë më parë, në pritjen që u bë në Shkodër, ATA ishin të parët. Tek dera e makinës, tek tufat me lule, tek përqafimet dhe premtimet. Para kamerave, sigurisht që fjalët e bukura nuk mungojnë asnjëherë. Drejtuesit e pushtetit lokal, gati dy javë më parë thanë dhe u deklaruan krenar për arritjet e bashkëqytetarit të tyre Erkand Qerimaj që kishte zënë vendin e parë në Europë. Atë ditë u tha dhe u deklarua se do bëhej më e mira e mundshme që Erkandit t’i krijoheshin kushte sa më të mira stërvitore. Madje u premtua se shpejt do ndërhyhej në palestër për ta meremetuar me paisjet e duhura dhe krijimin e kushteve sa më të mira stërvitore në mënyrë që ky Kampion Europe, pse jo të mos bëhej edhe Kampion Olimpik! Por nga e thënë në të bërë, ka shumë distancë. Sidomos në Shkodër. Më e bukura është se sot, në mbledhjen e rradhës të Këshillit Bashkiak të këtij qyteti, ky KAMPION është “injoruar”. Ndoshta është më mirë të themi se ai institucion ka injoruar veten. Këshilltarë të ndryshëm kanë ngritur zërin sot për ndonjë shpërblim të mundshëm për Qerimajn për suksesin e arritur, një sukses ky i jashtëzakonshëm dhe i paarritur ndonjëherë më parë në historinë e sportit shkodran. Por përgjigja që kanë marrë nga kryetari i Këshillit Bashkiak, ka qenë qesharake. “Qerimaj në kampionatin europian nuk ka përfaqësuar Shkodrën por ka përfaqësuar Shqipërinë. Duke qenë kështu, i takon Qeverisë më parë t’i japë shpërblimin që i ka premtuar dhe pasi ta ketë bërë ajo këtë gjë, atëherë do mblidhemi dhe të diskutojmë edhe ne për ta shpërblyer”. Një deklaratë e turpshme! Një deklaratë e cila ka sjellë irritimin e disa këshilltarëve që kanë vendosur të braktisin mbledhjen. Të krijohet ideja se Qerimaj ka dalë “lëmoshë”. Ky është shpërblimi që Shkodra i jep këtij Kampioni. Thonë pastaj pse iku ky apo ai sportist dhe braktisi Shqipërinë. Vendi ynë është bërë për t’u braktisur “natën për hanë” siç thonë shkodranët. Janë këta njerëz që pak vite më parë i mohuan këtij peshëngritësi mundësinë e marrjes së një apartamenti me kredi të zbutur nga ato që bëhen për të pastrehët, ndonëse kishte shumë nevojë për një të tillë (në fund të fundit, nuk po ia falnin). Janë po këta njerëz që sot, janë “tallur” me suksesin e Erkand Qerimajt dhe kjo është e pamoralshme. Erkand Qerimaj e ka bërë punën e tij, ngriti peshat dhe i tha gjithë botës se jam nga SHKODRA. Por ky qytet po bën gjënë më të keqe, nuk po e respekton ashtu siç duhet këtë djalë të sajin dhe këtu duket se ka marrë fund gjithçka. Këshilltarë të ndryshëm në mbledhjen e sotme, i kanë treguar kryetarit të Këshillit Bashkiak se në Tiranë Romela Begaj (sportistja që doli e dyta në Europë) është shpërblyer me 20 milionë lekë të vjetra nga kryebashkiaku i Tiranës. Por ky kryetari “jonë” ka lëshuar sërish batutën e rradhës: “Janë rrena. Nuk ka asnjë lekë të miratuar nga Bashkia Tiranë. Leni ça thonë gazetat. Bjerini, ku janë gazetat që e kanë shkru atë gjë”. Deri këtu kanë shkuar punët në Shkodër. Dhe kjo nuk ka moral.
www.shkodrasport.com
