Përveç ekipit të volejbollit të të rejave, edhe ai i basketbollit është shumë pranë titullit kampion.
Ai ka fituar ndeshjen gjysmëfinale ndaj Partizanit duke siguruar të drejtën për të kaluar në finale.
Ndeshjet e plej-ofit të këtij kampionati është vendosur të luhen në Shkodër nga Federata Shqiptare e Basketbollit.
Sipas shortit, vajzat shkodrane janë ndeshur me Partizanin dhe kanë fituar ndaj tyre me rezultatin e thellë 114 me 44.
Një rezultat që tregon më së miri edhe për epërsinë e tyre. Trajnerja Xhuli Shestani duke folur për mediat pas kësaj ndeshje, ka vlerësuar paraqitjen e ekipit që drejton.
“Vajzat kanë shumë ego dhe duan ta fitojnë këtë titull kampion. E kanë treguar edhe gjatë kampionatit, e treguan edhe sot në ndeshjen gjysmëfinale ndaj Partizanit me të cilin fituam me rezultat të thellë.
Na ka mbetur edhe një takim dhe shpresoj ta kurorëzojmë me sukses edhe atë”- është shprehur ajo.
Finalja do të luhet të shtunën në orën 11.00 po në pallatin e sportit “Qazim Dervishi” dhe Shestani premton titullin kampion për ekipin e Vllaznisë.
