Kushtoi 135 milionë euro (përfshirë bonuset). Kur Real Madridi e pagoi këtë shumë stratosferike në arkën e Borussia Dortmundit, për ta sjellë Jude Bellingham në “Stantiago Bernabeu”, shumë menduan për maninë klasike të Florentino Perez për madhështi, i cili, megjithatë, rrallëherë gabon në merkato (falë edhe arkës plot).
Ancelotti kishte humbur Benzema dhe mendohej se do të ishte më e dobishme të fokusohej te një sulmues i stërkonfirmuar, si Kane apo Mbappé. Në vend të kësaj, erdhi një mesfushor anglez i lindur në vitin 2003. Ai e nisi sezonin te Real Madridi e në nivelin më të lartë.
6 fitore në 6 ndeshje mes La Liga-s dhe Champions League. 6 gola në 6 paraqitje për Bellingham. Shpesh ishin gola vendimtarë, si ai kundër Union Berlin, një hap larg bilbilit të trefishtë të fundit. Pse anglezi ka kaq ndikim në rezultatet dhe lojën e Real Madridit?
Përgjigja vjen nga cilësitë e tij të shkëlqyera, të kombinuara me inteligjencën e trajnerit italian. Ancelotti, pa sulmuesin e pastër (Benzema), që u transferua në Arabinë Saudite, vendosi të fokusohej në një sistem tjetër loje, me një mesfushor-sulmues pas dy sulmuesve.
Sulmuesit, Vinicius dhe Rodrygo, janë ata që e mbështetën Benzema sezonin e kaluar dhe që tani luajnë më të centralizuar, gjithsesi të lirë për të kërkuar pozicionin jashtë ose për të liruar hapësirat për ata që vijnë nga pas.
Dhe nga pas vjen një nga “armatë” e mesfushorëve më të fortë në botë: Modric, Valverde, Camavinga, Tchouameni, Kroos dhe Bellingham. Gjashtë kampionë për katër vende. Ancelotti i alternon ato në varësi të ndeshjeve dhe momenteve, por mbi të gjitha, të katër ata që luajnë ndryshojnë pozicionet e tyre pa role fikse.
Kjo është më shumë për shkak të aftësisë lexuese të individëve sesa një loje veçanërisht të sofistikuar dhe të organizuar. Bellingham, një mesfushor-sulmues teorik, e di se kur duhet të futet në zonën kundërshtare, kur është e nevojshme të mbështesë në fazën e ndërtimit, kur të zgjerohet dhe ku të drejtojë lojën e kundërshtarit.
Pak futbollistë në botë kanë perceptimin e tij për hapësirën. Kësaj inteligjence taktike duhet t’i shtohen edhe cilësitë personale, që i lejojnë edhe paraqitje të shkëlqyer para portës kundërshtare.
Nuk mund të thuhet se ka lindur një yll, duke qenë se bota e futbollit e kishte vendosur tashmë në grupin e të rinjve më interesantë, por dyshimi është gjithnjë e më i fortë se për disa vite Jude Bellingham do të ketë një vend të përhershëm në top-formacionin e më të mirëve të botës së futbollit./telesport/
