Pak ditë më parë, Edi Reja u emërua si trajneri i ri i Shqipërisë, duke zënë në këtë mënyrë vendin e Kristian Panuçit të larguar nga Kombëtarja pak orë pasi Shqipëria u mund nga Turqia. Trajneri i ri i kuqezinjve, është pritur mirë dhe kanë qenë futbollistët ata të cilët të bindur, kanë pranuar se Reja mund të rikthejë harmoninë në skuadër.
Në një lidhje telefonike me ‘Zona Gol’, gardiani Etrit Berisha u shpreh se Rejën e njeh pasi ka punuar me të te Lacio dhe se ndryshe nga Panuçi ky si synim kishte të krijonte një Shqipëri sulmuese, ai e përqendron lojën e tij duke forcuar mbrojtjen.
Edi Reja? Kam pasur rastin të punoj me Rejën rreth 6 ose 7 muaj kur ishte trajner te Lacio. Ka shumë kualitete në pjesën e mbrojtjes. Në ato 6 muaj kemi mësuar shumë, me ardhjen e tij ndryshuan shumë gjëra dhe u rikthyem te rezultatet pozitive”.
Ndryshimi me Panuçin? Karakteristikë e tij është loja mbrojtëse, diçka që na shkon përshtat dhe ne pasi i kemi të gjitha karakteristikat e mundshme. Kam pasur mundësinë ta takoj para disa ditësh dhe më është shfaqur shumë optimist dhe ka pasur shumë dëshirë që të marrë kombëtaren tonë. Shpresoj të na ndihmojë në arritjen e objektivave tona.
Unë mendoj se me ardhjen e Rejës do të fokusohemi më shumë në fazën mbrojtëse. Në njëjtën kohë duhet të mendojmë dhe për fazën sulmuese, pasi nëse nuk shënon gola nuk mund të shkosh në Europian. Gjithsesi unë besoj se pikënisja është mbrojtja më pas mund të punosh me repartet e tjera.
Na tha se e kishte të vështirë që të shikonte një ekip që ishte në vështirësi dhe nuk kishte reagim. Ndoshta është kjo arsyeja përse ai e ka marrë këtë post. Jo vetëm për të përgatitur lojën, por edhe të punojë nga ana psikologjike e të rikthejë harmoninë në ekip. Një fitore në ndeshjen e radhës do të na ndihmonte për moralin, por edhe për mundësitë tona për t’u kualifikuar në Europian”.
Ndeshja me Napolin? Jemi përgatitur jashtëzakonisht mirë dhe e dimë rëndësinë e këtij takimi. Do të hyjmë për fitore. I dimë aftësitë tona dhe se përballë kemi një kundërshtar shumë të fortë. Besoj se nga ana e motivimit jemi më të avantazhuar”, tha Berisha. /VipSport/
