Në momentet jo të duhura të kampionatit, ka zhvilime tek Besëlidhja. Ndonëse skuadra ndodhet në pozita shumë të vështira në renditje, ajo tashmë ka lëvizje në pankinë. Trajneri Saimir Malko ka dhënë dorëheqjen nga drejtimi i kësaj skuadre dhe burime të gazetës sonë bëjnë të ditur se zëvendësuesi i tij pritet të jetë Sinan Bardhi. Presidenti Gjokë Noka në këto momente është në takim me këtë të fundit për ta bindur që ai të marrë përsipër drejtimin e skuadrës në këto momente të vështira. Megjithatë situata nuk është shumë normale në këtë skuadër. Ish-trajneri Saimir Malko në një prononcim ekskluziv për gazetën online shkodrasport.com, ka thënë: “U detyrova të jap dorëheqjen sepse nuk mund të vazhdohej më të punoja me këtë skuadër. Aty ka probleme të mëdha financiare sepse futbollistët kanë disa muaj që nuk paguhen. Po ashtu, presidenti Noka bën presion të vazhdueshëm për ndërhyrje në formacion. Rasti më i fundit ka qenë në ndeshjen me Elbasanin të shtunën që shkoi. Në pushimin e ndeshjes ai më kërkoi të largoja nga fusha Miliçin por pikërisht ky lojtar në pjesën e dytë shënoi të dy golat dhe na dha fitoren. Megjithatë, të hënën kur u riktheva në Lezhë për të vazhduar punën, u gjenda në një presion të madh për atë veprim që kisha bërë ngaqë nuk e zëvendësova atë lojtar. Në kushte të tilla nuk mund të vazhdoja më dhe dhashë dorëheqjen. Më vjen keq për futbollistët që janë shumë të edukuar dhe të talentuar dhe për tifozët që na kanë mbështetur por skuadra nuk mund të funksionojë kështu me probleme rrogash dhe ndërhyrjesh në formacion”.www.shkodrasport.com
