Pas asaj ndaj Valbonës të dy javëve më parë, Besëlidhja ka nesër një tjetër finale dhe nëse e kalon edhe atë me sukses, atëherë objektivi i saj është thuajse shumë pranë.
Pasditen e së shtunës, në orën 13:30 në stadiumin “Besëlidhja”, skuadra lezhjane do të presë Ilirinë e Fushë- Krujës. Kjo e fundit ka edhe ajo pretendimet e saj dhe do të kërkojë të rihapë çështjen e vendit të parë.
Fushë- krujasit aktualisht mbajnë vendin e tretë në grupin A të kategorisë së dytë teksa kanë grumbulluar deri tani 29 pikë, ndërkohë që përpara tyre është Valbona me 31 pikë dhe Besëlidhja që kryeson me 33 pikë.
Megjithatë favorit për këtë sfidë është skuadra e drejtuar nga trajneri Dritan Smajli. Ajo po kalon një formë shumë të vështirë sportive dhe sigurisht që nesër do të bëjë edhe një sforco tjetër për ta mundur edhe këtë rival dhe nëse ia del, padyshim që vendi i parë më pas do jetë “autostradë”.
Gjithsesi, stafi teknik ka dashur ta mbajë me këmbë në tokë skuadrën. Një avantazh i madh për Besëlidhjen edhe këtë herë pritet të jenë tifozët e shumtë që kanë premtuar se do ta mbushin sërish stadiumin e Lezhës në mbështetje të skuadrës së tyre të zemrës./SHKODRA-SPORT.COM/
